SQO-da eń kóp qymbattaǵan taýarlar ataldy

PETROPAVL. KAZINFORM - Soltústik Qazaqstan oblysynda maýsym aıynda ınflıatsııa deńgeıi jyldyq eseppen 11% boldy.

Bul týraly Ulttyq statıstıka bıýrosynyń oblystyq departamenti málimdedi.

Barlyq negizgi taýarlar men qyzmet túrleri boıynsha baǵa ósken. Azyq-túlik taýarlary bir jylda 12% qymbattasa, azyq-túlikke jatpaıtyn ónimder – 10%, al aqyly qyzmetter – 13% ósken.

Máselen, 2024 jylǵy maýsymmen salystyrǵanda, kúnbaǵys maıy - 29%, tuz – 28%, balyq jáne teńiz ónimderi 27% qymbattaǵan. Sonymen qatar, alkogolsiz sýsyndar – 19%, kondıter ónimderi – 18%, jas jemister – 13%, qatty irimshik – 12%, et jáne sút ónimderi 10% qymbattady.

Jas kókónister baǵasy 36% artty. Ásirese, pııaz eki jarym esege, kartop – 88%, qyryqqabat – 56%, al sábiz – 54% deıin qymbattaǵan. Tamaq ónimderiniń ishinen jumyrtqa ǵana 3% arzandaǵan.

Azyq-túlikke jatpaıtyn taýarlar men qyzmetter de qymbattaǵan. Oıynshyqtar men oıyndarǵa baǵa 25% ósti. Kıim men aıaq kıim – 13%, turmystyq taýarlar men jeke qoldanýǵa arnalǵan quraldar – 8%, dári-dármek 6% qymbattady. Benzınniń baǵasy 5%, dızel otyny 4% artqan.

Qyzmet kórsetý salasynda da ósim bar. Gazdyń baǵasy, ásirese taratý jelileri boıynsha tasymaldanatyn túri birden 63% ósken. Demalys, oıyn-saýyq jáne mádenıet salasyndaǵy qyzmetter - 20%, sanatorıı qyzmetteri – 9% artty. Kólik qyzmetteri jalpy 13% ósti, onyń ishinde áýe qatynasy – 25%, avtomobıl kóligi 6% kóterilgen.

Sonymen qatar, jaldamaly turǵyn úı úshin tólenetin aqy bir jylda 16% artty.

Buǵan deıin Ulttyq bank sarapshylar qaýymdastyǵy arasynda júrgizilgen kezekti makroekonomıkalyq saýalnamanyń nátıjesin jarııalaǵan edi.