SQO-da emhana ǵımarattarynyń 75 paıyzy tozǵan

PETROPAVL. QazAqparat – Soltústik Qazaqstan oblysyna Densaýlyq saqtaý mınıstri Ajar Ǵınııat kelip, óńirdegi medıtsına salasyndaǵy birqatar máselemen tanysty. Óńirde alǵashqy medıtsınalyq-sanıtarlyq qyzmet kórsetetin 530 mekeme bolsa, sonyń shamamen 75 %-ynyń ornalasqan ǵımaraty tozǵan, dep habarlaıdy QazAqparat tilshisi.

SQO-da alǵashqy medıtsınalyq-sanıtarlyq kómek kórsetýdiń 530 nysany bar. Bul eldegi medıtsınalyq kómektiń bastapqy deńgeıindegi barlyq uıymdardyń 10 %-ǵa jýyǵy. Onyń ishinde 4 emhana Petropavlda ornalasqan. Al bul uıymdar ornalasqan ǵımarattardyń 74,8 %-y búginde tozǵan.

Óńirge is-sapary barysynda Densaýlyq saqtaý mınıstri Ajar Ǵınııat jergilikti atqarýshy organdardyń nazaryn osy máselege aýdardy. Onyń pikirinshe, ásirese aýyldaǵy medıtsınalyq uıymdardyń ınfraqurylymyn jaqsartý jáne materıaldyq-tehnıkalyq qamtamasyz etý qajet.

SQO-da osydan birer jyl buryn kadr jetispeýshiligi máselesi ótkir tursa, búginde ol birtindep sheshilip jatyr. Desek te óńirge áli de 200-ge jýyq dáriger qajet.

«Jergilikti bıýdjet esebinen stýdentter men medıtsına qyzmetkerlerin oqytýǵa qarajat bólýdi, turǵyn úı berýdi jáne basqa da áleýmettik qoldaý sharalaryn, saralanǵan eńbekaqy tóleýdi qoldanyp, jas kadrlardy aýylda ornyqtyrý úshin motıvatsııa jasaý qajet»,- dep atap ótti mınıstr.

Sonymen qatar, mınıstr aýyl turǵyndary úshin chekap túrinde kásibı tekserýler tizbesin keńeıtý, ótkiziletin skrınıngterdiń qoljetimdiligin arttyrý, aýyldyq medıtsına qyzmetterine birqatar tarıfterdi arttyrý boıynsha josparlar týraly aıtty. A.Ǵınııattyń aıtýynsha, bul sharalar, saqtandyrylmaǵan halyqty qosa alǵanda, aýyl turǵyndaryn kásibı tekserýlermen qamtýdy ulǵaıtýǵa, nátıjesinde sozylmaly aýrýlardyń jáne asqynǵan jaǵdaılardyń ósýin azaıtýǵa múmkindik beredi.

Jalpy óńirdi aralaý barysynda Ajar Ǵınııat medıtsına qyzmetkerlerimen, oblys halqymen jekelegen kezdesýler ótkizip, azamattardy jeke máseleleri boıynsha qabyldamaq, sondaı-aq brıfıngte BAQ ókilderiniń suraqtaryna jaýap beredi.