SQO-da emdeý mekemelerine 25 ottegi kontsentratory tabystaldy

PETROPAVL. QazAqparat – Soltústik Qazaqstan oblysynda Qazaqstan musylmandary dinı basqarmasy janyndaǵy «Zeket» qaıyrymdylyq qorynyń uıymdastyrýymen provızorlyq ortalyqtarǵa búgin 25 ottegi kontsentratory jáne 73 pýlsometr taratyldy, dep habarlaıdy QazAqparat tilshisi.

Din ókilderi «Ómirge úmit syıla!» respýblıkalyq aktsııasyn qolǵa alyp, áleýmettik jeli arqyly qaterli vırýsty juqtyrǵandarǵa kómek kórsetýge shaqyrdy. Igi iske soltústikqazaqstandyqtar da qoldaý kórsetip, nátıjesinde 26 mln teńge jınaldy.

«Úndeýimizdi halyq, kásipkerler, metsenattar qoldap, óz atynan, ujym atynan 500 myń, 1 mln teńgeden qarjy salǵandar boldy. Qomaqty soma jınalǵannan keıin oblystyq densaýlyq saqtaý basqarmasynyń basshylyǵymen aqyldasyp, qazirgi ýaqytta neniń asa qajet ekenin bildik. Osylaısha 15 mln teńgege Reseıden 36 dana ottegi kontsentratoryna tapsyrys berdik. Bul qurylǵylarǵa qazir suranys óte joǵary. Jetkizýshi kompanııa kóp mólsherde taýyp bere almaǵandyqtan baryn aldyq. Búgin emdeý mekemelerine ekinshi ret kómek berip otyrmyz», - deıdi SQO ortalyq meshitiniń naıb ımamy, QMDB «Zeket» qorynyń SQO boıynsha ókili Muhammadzahır Mırzaev.

Bul joly Reseıden 25 dana ottegi kontsentratory jáne 73 pýlsometr jetkizildi. Dem alý apparatynyń 15-i oblystyq kópsalaly aýrýhanaǵa berilip, qalǵany qajetine qaraı aýdan aýrýhanalaryna jiberilmek. Pýlsometrler de úlestiriledi.

«Ómirge úmit syıla» aktsııasynyń alǵashqy kezeńinde ǵana el boıynsha 150 ottegi kontsentratory taratyldy. Qaıyrymdylyq sharasy munymen toqtamaıdy. Esepshotqa aqsha túsip jatyr. Dárigerlermen aqyldasa otyryp, qolymyzdan kelgenshe kerek-jaraqtaryn áperemiz. Qıyn sátte jumyla qoldaý bildirgenderge alǵysymdy aıtamyn», - deıdi Muhammadzahır Mırzaev.

Іndet bastalǵaly SQO-da qaýipti vırýstan 1401 adam emdelip shyqty. Onyń 58-i búgin aýrýhanadan shyǵyp, qatarǵa qosyldy. Qazirgi tańda óńirde 480 ınfektsııalyq jáne 1620 provızorlyq oryn bar.