SQO-da elimizdegi alǵashqy aýdandyq kreatıvti IT-ortalyq ashyldy

ASTANA. KAZINFORM –  Soltústik Qazaqstan oblysynyń Shal aqyn aýdany, Sergeevka qalasynda Qazaqstandaǵy alǵashqy aýdandyq kreatıvti Esil.AI atty IT-ortalyq ashyldy. Bul týraly Mádenıet jáne aqparat mınıstrliginiń baspasóz qyzmeti habarlady.

Bastama aımaqtyq Qyzyljar Creative Center habynyń biryńǵaı jelisiniń aıasynda jumys isteıdi.

Ortalyqtyń maqsaty – aýyl turǵyndarynyń tsıfrlyq saýattylyǵyn arttyrý, IT-kásipkerlikti damytý jáne jańasha oılaýdy qalyptastyrý.

Esil.AI ortalyǵy – aýyl halqyn kreatıvti ekonomıkaǵa tartýǵa, tehnologııalyq kásipkerlikti damytýǵa jáne jańa jumys oryndaryn qurýǵa baǵyttalǵan Digital Keruen óńirlik jobasynyń bir bóligi.

IT-ortalyq aýdandyq kitaphana ǵımaratynda ornalasqan jáne jalpy aýdany 134 sharshy metr bolatyn eki qabatty qamtıdy. Keńistik noýtbýktarmen, ınteraktıvti panelmen, oqý dronymen, 3D-prıntermen jáne kýrstar, hakatondar men tájirıbelik sabaqtar ótkizýge arnalǵan jabdyqtarmen jasaqtalǵan.

Esil.AI ortalyǵynda qazirdiń ózinde jasandy ıntellekt (AI), tsıfrlyq saýattylyq, negizgi kompıýterlik daǵdylar, dızaın jáne kreatıvti mamandyqtar boıynsha kýrstar bastaldy.

Oqytý kezeń-kezeńmen, bazalyq deńgeıden bastap, joǵary deńgeıge deıin júrgiziledi. Bolashaqta onlaın-kýrstar men kóshpeli sheberlik sabaqtaryn iske qosý josparlanǵan. Jobaǵa aýyl turǵyndarynyń barlyǵy qatysa alady.

Aıta ketelik Toqaev Jas kásipkerler, ǵalymdar, ınjenerler, IT-mamandar Qazaqstannyń jańa elıtasyn qalyptastyryp jatqanyn aıtqan edi.