SQO-da elimizdegi jalǵyz qalaıy ken orny ıgerile bastady
PETROPAVL. QazAqparat - Soltústik Qazaqstan oblysynda Ortalyq Azııadaǵy eń iri, elimizdegi jalǵyz qalaıy ken orny «Tin One Mining» ıgerile bastady, dep habarlaıdy QazAqparat tilshisi.
SQO ákimi baspasóz qyzmetiniń habarlaýynsha, Aıyrtaý aýdanynda ornalasqan qalaıy ken orny kóp jyldar boıy zertteldi. Al mamyr aıynda qazba jumystary bastaldy. Ken ornyna barǵan SQO ákimi Qumar Aqsaqalov atalmysh jobanyń oblys úshin mańyzdylyǵyn atap ótti.
«Bul bizdiń oblysqa kelgen alǵashqy iri jer qoınaýyn paıdalanýshy. Atalǵan jobanyń júzege asýyn kóp kúttik. Oblys ekonomıkasyna rekordtyq ınvestıtsııalar quıylady, shamamen 100 mlrd teńge. Kelesi jyly taý-ken baıytý kombınaty iske qosylady. Qalaıy ken ornynda 600 adam eńbektenedi», - dedi Qumar Aqsaqalov.
Jer qoınaýyn paıdalanýshylar úshin óńirde bar jaǵdaı jasalǵan. Bul jaıynda «Tin One Mining» AQ vıtse-prezıdenti Dmıtrıı Hvan aıtyp ótti.
«Memleket tarapynan bizge jan-jaqty kómek kórsetilýde. Elektr jelileri qoıylyp, 50 megavattyq stansy salyndy. Bizge bul eleýli kómek, óıtkeni shyǵyndarymyzdy qysqartady. Osylaısha, memleket biz sııaqty jer qoınaýyn paıdalanýshylardy yntalandyryp otyr», - dedi Dmıtrıı Hvan.
Mamandardyń aıtýynsha, Qazaqstanda tabylǵan qalaıynyń 65 paıyzy SQO-da ornalasqan. Syrymbettegi qalaıynyń qory 153 myń tonna. Jylyna kásiporyn 10 myń tonna qalaıy óndirmek. Barlyǵy 500 mlrd teńgeniń ónimi shyǵarylmaq. Sarapshylardyń aıtýynsha, bul joba Qazaqstanǵa álemdegi qalaıy óndirisi boıynsha úzdik ondyqqa enýge múmkindik bermek. Qazir London bırjasynda qalaıynyń bir tonnasy 21 tys $ baǵalanyp otyr.
