SQO-da eliktiń kesirinen úsh kólik zaqymdandy
PETROPAVL. QazAqparat – Soltústik Qazaqstan oblysynda jolǵa shyqqan elik jol-kólik oqıǵasyna sebepker boldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, 20 tamyz kúni saǵat 10:00 shamasynda Aqqaıyń aýdany Astrahanka eldi mekeniniń mańynda jol-kólik oqıǵasy boldy. «Nur-Sultan – Petropavl» tas jolynyń 455 shaqyrymynda jolǵa elik atyp shyqqan. Hyundai Tucson kóliginiń júrgizýshisi tejegishti basqanymen, soqqydan qutyla almady. Soqqy saldarynan elik qarsy baǵytqa ushyp, Audi 100 kóligine soǵyldy. Janýar sol jerde óldi, eki kólikke zaqym kelgenimen, ishindegi adamdary aman, zardap shekken joq.
Birer kún buryn dál sol jol ýchaskesinde osyǵan uqsas jol-kólik oqıǵasy tirkeldi. Bul joly da jolǵa kenetten shyqqan elikti qatty jyldamdyqpen kele jatqan Jac J7 kóligi soqqan. Rýlde astana qalasynyń turǵyny bolǵan. Ol Petropavldan shyǵyp, úıine qaıtyp bara jatqan. Janýar qatty soqqydan ólip qaldy, kólik júrgizýshi zardap shekken joq.
«Kólik júrgizýshilerin ormandardyń mańynda, eldi mekenderdiń qasynan ótkende asa saq bolý qajettigin eskertemiz. Jolǵa jaqyn ornalasqandyqtan túlik, janýarlar kenetten shyǵýy múmkin. Jol boıynda arnaıy belgiler bar, muny da nazarda ustaǵan jón. Mundaı ýchaskelerde jyldamdyqty azaıtyp ótken durys», - deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.
Polıtseıler janýarlarǵa qatysty jol-kólik apaty jıi tirkeletin ýchaskelerge jylqynyń 27 maketin qoıdy. Budan basqa oblys aýdandarynda polıtsııa kólikteriniń 18 maketi qoıylǵan. Aqqaıyń, Ýálıhanov jáne Aıyrtaý aýdanyndaǵy eldi mekenderge jol jıeginde ótkeli turǵan balanyń 5 maketi qoıyldy.
