SQO-da elikter aýyl kóshelerine kirip ketti
Áleýmettik jelide Petropavl kóshelerinde, avtokólik joldarynda top-tobymen júrgen elikterdiń beınejazbalary tarap jatyr. Turǵyndardyń pikirinshe, olardyń qarny ash, qalyń qardan qorek taba almaı, eldi mekenderge kirýge májbúr.
SQO orman sharýashylyǵy jáne janýarlar dúnıesi aýmaqtyq ınspektsııasynyń bas mamany Andreı Krasnıkovtyń aıtýynsha, ótken jyldyń qarasha aıynan bastap óńirge Reseıdiń kórshi oblystarynan elikterdiń mıgratsııasy bastaldy. Keń dalada erkin jaıylǵan janýarlar úshin eshqandaı shekara joq.
«Avtojol ústine shyqqan, eldi mekenderdiń mańyndaǵy júrgen elikterdi qarasha aıynan baıqaı bastadyq. Olar – Reseıden kelip jatqan janýarlar. Kórshi eldegi áriptesterimizben habarlasyp, jaǵdaıdy bildik. Olardyń aıtýynsha, kúzde qalyń qar jaýǵan, arty jańbyrǵa ulasqan. Keıin qatty aıaz bolyp, jerdi qatyryp tastaǵan. Bul tuıaqty janýarlarǵa azyq tabýdy qıyndatyp jibergen. Bir sebebi osy bolýy múmkin. Ekinshi sebebi – jyrtylǵan aýmaqtardyń sany artqan. Bul janýarlardyń jaıylymyn azaıtyp, yǵystyrǵan. Ashyqqan elikter azyq izdep kelip jatyr», - deıdi Andreı Krasnıkov.
Mamannyń aıtýynsha, Soltústik Qazaqstandy sibir eligi mekendeıdi. Sońǵy esep boıynsha óńirde olardyń sany 18 myńnan asqan. 43 ańshylyq sharýashylyǵy 27 paıdalanýshyǵa berilgen. Olar ańdardy qorǵap qana qoımaı, kerek bolǵan jaǵdaıda qoldan azyqtandyrady. Sol úshin jaz boıy shóp, qaıyń sypyrǵylary jáne astyq qaldyqtary daıyndalady.
«Bizge Reseıden jer aýyp kelip jatqan da sibir eligi. Olardyń bir bóligi keıin kóktemde qaıtady. Jalpy, kelgeni durys, odan qorqýdyń qajeti joq. Jergilikti janýarlarmen aralasyp, tuqymy jaqsarady. Jabyq popýlıatsııa kezinde gen nasharlaıtyny belgili. Al jalpy bul janýarlardy jaqyn mańda kórseńiz olarǵa jaqyndaýdyń, ustaımyn dep qýýdyń qajeti joq. Odan adam nemese janýar jaraqat alýy múmkin. Sondaı-aq turǵyndarǵa elikterdi qoldan tamaqtandyrýǵa bolmaıtynyn eske salamyn. Óıtkeni olar túz janýarlary», - deıdi Andreı Krasnıkov.
Foto: instagram.com/skopetro/
