SQO-da elikter ashtan ólip jatqan joq – ınspektsııa
PETROPAVL. QazAqparat – Soltústik Qazaqstan oblysynda elikterdiń ólýine qatysty áleýmettik jelide taraǵan beınejazbalarǵa qatysty orman sharýashylyǵy jáne janýarlar álemi aýmaqtyq ınspektsııasynyń ókilderi túsinik berdi, dep habarlaıdy QazAqparat tilshisi.
SQO-da birer kúnnen beri áleýmettik jelide ormanda, jol jıeginde ólip jatqan elikterdiń beınejazbasy tarap ketti. Avtorlarynyń aıtýynsha, jabaıy janýarlar bıyl qardyń qalyń túsýinen ottaı almaı, japapı qyrylyp jatqan kórinedi.
Osy jaǵdaıǵa qatysty SQO orman sharýashylyǵy jáne janýarlar álemi aýmaqtyq ınspektsııasynyń bólim bastyǵy Oleg Bespalov túsinik berdi. Mamannyń aıtýynsha, jappaı qyrylyp jatyr deý – asyra aıtqandyq.
«Áleýmettik jelide taraǵan beınejazbalardan keıin qazir kóptegen aqparat quraldarynda SQO-da elikter jappaı qyrylyp jatyr dep berilip jatyr. Bul durys emes. Elikterdiń ólgeni ras. Ol týraly bilemiz. Ár fakti boıynsha jumys istep jatyrmyz. Jalpy oblys aýmaǵynda aqpan-naýryz aılarynda on shaqty elik qyryldy. Olardyń ólý sebepteri ártúrli. Keıbiri azyq izdep jolǵa shyǵyp, kólik astyna túsip óledi. Qańǵyǵan ıtterge jem bolady», - deıdi Oleg Bespalov.
Elik óńirdiń búkil aýmaǵynda kezdesedi, keń taralǵan jabaıy ań. Byltyrǵy sanaq boıynsha qazir oblysta sany 18 myńnan asady.
«Elik jabaıy ortada ómir súretindikten erkin jaıylady. Jolǵa shyǵyp ketýi qalypty jaǵdaı.
Keshe ǵana aýdandarǵa shyqtym. Keı jerlerde qar ketip qalǵan. Elikterge jaıylýǵa múmkindik bar. Sol sebepti ashtan óledi, jappaı qyrylady deý durys emes», - deıdi SQO orman sharýashylyǵy jáne janýarlar álemi aýmaqtyq ınspektsııasynyń bólim bastyǵy.
