SQO-da elik atqan kúdiktiler ustaldy
PETROPAVL. QazAqparat – Soltústik Qazaqstan oblysy Qyzyljar aýdanynda ýchaskelik polıtsııa ınspektory men qoryqshy sibir eligin atty degen kúdikpen úsh adamdy ustady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, ýchaskelik polıtsııa ınspektoryna qoryqshy kelip, Znamenskıı eldi mekeniniń mańynda adamdardyń, ıttiń jáne kóliktiń izderin kórgenin aıtqan. Tártip saqshysy men tabıǵı park ınspektory izben júrip otyryp, ormannan ańdy soıǵan oryndy tabady. Kóp uzamaı iz olardy aǵash daıyndap jatqandardyń vagon-jataǵyna ákeledi. Vagonshadan eki qarý-jaraq, oq-dári jáne sibir eliginiń eti men terisi, basy tabyldy. Ettiń bir bóligi otta turǵan qazannan tabyldy.
Ustalǵan úsheýdiń bireýi Býlaev qalasynyń 41 jastaǵy turǵyny, buryn sottalǵan. Sózine qaraǵanda, ruqsat qujaty bolmasa da traktoryna minip ań aýlaýǵa shyqqan. Ózimen birge onyń eki myltyǵy bolǵan. Al 43 jáne 32 jastaǵy eki tanysy ańshynyń ótinishi boıynsha elikterdi úrkitken.
Zańsyz ańshylyq deregi boıynsha qylmystyq is qozǵaldy. Sondaı-aq kúdiktilerdiń birine qarýdy zańsyz saqtaǵany úshin ákimshilik is bastaldy. Qazir memleketke keltirilgen shyǵyn kólemi eseptelip jatyr.
«Polıtseıler men múddeli vedomstvolardyń tyǵyz qarym-qatynasynsyz tabıǵatty qorǵaý jumystaryn tıisti deńgeıde atqarý múmkin emes. Tabıǵatty qorǵaý polıtsııasynyń barlyq reıdtik is-sharalary tabıǵı resýrstar jáne tabıǵat paıdalanýdy retteý basqarmasynyń ınspektorlarymen, ańshylyq jáne orman sharýashylyqtarynyń qoryqshylarymen birge júrgiziledi», - deıdi SQO PD Jergilikti polıtsııa qyzmeti basqarmasynyń bólim bastyǵy Sergeı Lıpko.
SQO-da jyl basynan zańsyń ań aýlaýdyń 14 deregi tirkeldi. Ań aýlaý tártibin buzǵan 554 adam, balyq aýlaý tártibin saqtamaǵan 248 adam ákimshilik jaýapkershilikke tartyldy.
