SQO-da elevatorda eki jumysshy aýyr jaraqat aldy
PETROPAVL. KAZINFORM — Soltústik Qazaqstan oblysyndaǵy elevatorda astyqty keptirý kezinde eki jumysshy aınalyp turǵan mehanızmnen jaraqattanyp, aýrýhanaǵa jetkizildi.
SQO boıynsha memlekettik eńbek ınspektsııasy departamentiniń málimetinshe, oqıǵa 3 qyrkúıek kúni saǵat 16:00 shamasynda Dýbrovnoe aýylyndaǵy «Agrofırma Mamlıýtskaıa» JShS elevatorynda bolǵan.
Jumysshylar astyq keptirgish qondyrǵysynda jumys istep, dánniń keptirgishke úzdiksiz berilýin baqylaǵan. Jumys barysynda qondyrǵynyń joǵarǵy bóliginde júrgen slesardiń shalbarynyń balaǵy bilikke ilinip ketken. Sonyń saldarynan kıimi oralyp, jumysshy sol jaq aıaǵynan ashyq synyq alǵan. Oǵan kómek kórsetýge tyrysqan áriptesiniń de qoly mehanızmge túsip, oń jaq bilegi synyp ketken.
Oqıǵany kórgen ózge jumysshylar dereý qondyrǵynyń elektr qýatyn óshirip, mehanızmdi toqtatqan. Zardap shekkenderge alǵashqy kómek kórsetilip, jedel járdem shaqyryldy. Aýyr jaraqat alǵan eki jumysshy da medıtsınalyq mekemege jetkizildi.
Bul oqıǵany vedomstvo baqylaýǵa aldy. Qazir onyń naqty sebepteri men barlyq mán-jaıy anyqtalyp jatyr.
Osyǵan deıin jyl basynan beri óndiriste 727 jumysshy zardap shekkenin jazǵan edik.
