SQO-da elevatorda aýyr jaraqat alǵan jigit jansaqtaý bóliminde jatyr
PETROPAVL. KAZINFORM – Petropavldaǵy elevatorda 18 jastaǵy jumysshynyń aıaǵy tehnıkaǵa túsip, aýyr jaraqat aldy.
Soltústik Qazaqstan oblysy boıynsha memlekettik eńbek ınspektsııasy departamentiniń málimetinshe, zardap shekken jigit kásiporynǵa 4 tamyzda astyq apparatshysy bolyp ornalasqan. «Shnek» stanogynyń astyndaǵy astyqty jınap jatqan kezde onyń sol aıaǵy stanoktyń qozǵalmaly bóligine ilinip, sonyń saldarynan jaraqat alǵan.
- Bul fakti boıynsha departamentte komıssııa quryldy, oqıǵanyń mán-jaıy anyqtalatyn bolady. Tergeý Zańǵa sáıkes on jumys kúni ishinde júrgiziledi. Tek sodan keıin ǵana onyń nátıjesi – sebebi, paıyzdyq úlesi boıynsha kináliler týraly aqparat jarııalanady, - dedi departament basshysy orynbasarynyń mindetin atqarýshy Ásel Abdýǵalıeva.
Mamannyń aıtýynsha, ásirese kóktem men kúzde osyndaı oqıǵalar jıileıdi. Onyń bir sebebi – jumys berýshiler qaýipsiz eńbek jaǵdaıyn jasaýdy eleýsiz qaldyrady.
SQO Densaýlyq saqtaý basqarmasy baspasóz qyzmetiniń málimetinshe, jaraqat alǵan jigit Petropavldaǵy kópbeıindi qalalyq jedel medıtsınalyq járdem aýrýhanasynyń travmatologııa pýnktine aýyr jaǵdaıda jetkizildi. Ol sol jaq aıaǵyndaǵy jaraqat aımaǵynyń aýyrsynýyna jáne jalpy álsizdikke shaǵymdanǵan.
Qosymsha tekserý júrgizilgennen keıin naýqas reanımatsııa bólimine jatqyzyldy. Jaraqattyń aýyrlyǵyna baılanysty shuǵyl túrde operatsııa jasaldy.
Dárigerler patsıentke jumsaq tinderdiń, qan tamyrlary men júıkeniń aýqymdy zaqymdanýymen qatar júretin sol jaq aıaqtyń aýyr jaraqaty dıagnozyn qoıdy. Jaraqat saldarynan aıaqtyń qanmen qamtamasyz etilýi kúrt buzylyp, aıaq-qoldyń jedel ıshemııasy jáne III dárejeli travmalyq shok damyǵan.
Qazirgi ýaqytta jigittiń jaǵdaıy aýyr, biraq turaqty dep baǵalanǵan. Medıtsınalyq brıgada naýqasqa qarqyndy em júrgizip, sol jaq aıaǵyn saqtap qalý úshin barlyq qajetti sharalardy qabyldap jatyr.
Buǵan deıin SQO Dýbrovnoe eldi mekenindegi elevatorda eki jumysshy aýyr jaraqat alǵanyn jazǵan edik.
Mamandardyń aıtýynsha, eki qolynan jaraqattanǵan 39 jastaǵy jigittiń oń jaq qolyna ampýtatsııa jasaýǵa týra keldi.
