SQO-da elevator aýmaǵynda órt shyǵyp, bir adam mert boldy
PETROPAVL. QazAqparat – Soltústik Qazaqstan oblysyndaǵy Tımırıazev aýdanyndaǵy elevator aýmaǵynda órt shyǵyp, saldarynan bir adam ıis tıip qaza tapty, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, oqys oqıǵa 7 maýsym kúni Tımırıazev eldi mekeninde bolǵan. Órt sóndirý qyzmetine saǵat 14.10 mınýt ketkende Tımırıazev elevatory aýmaǵyndaǵy astyq qabyldaý pýnktindegi temir ustasynyń bólmesinde órt shyqqandyǵy jóninde habar túsedi.
«Bizdiń mamandar órt sóndirýge shyqqan joq. Elevator qyzmetkerleri jalyndy baıqaı salysymen birden óz kúshterimen sóndirgen. Bólmedegi jartylaı janǵan tósek-orynnan 1990 jyly týǵan er adamnyń denesi tabyldy. Ol ıis tıip qaza tapqan. Mamandar oqıǵa ornynda jumys istep jatyr. Órttiń shyǵý sebebi men kelgen shyǵyn mólsheri anyqtalatyn bolady», - deıdi SQO TJD bastyǵynyń orynbasary Nurlan Atyǵaev.
Órt aldyn ala boljam boıynsha, sóndirilmegen temeki tuqylynan shyǵýy múmkin.
