SQO-da elektrovoz ben qar tazalaıtyn lokomotıv soqtyǵysty
PETROPAVL. QazAqparat – Soltústik Qazaqstan oblysynda ótken aptada qar qursaýynan 150-ge jýyq kólik pen 300-den astam adam qutqaryldy, dep habarlaıdy QazAqparat tilshisi.
SQO Tótenshe jaǵdaılar departamenti ótken aptany qorytyndylap brıfıng ótkizdi. Daǵdarys jaǵdaılar basqarmasynyń bastyǵy Rústem Jumaǵalıevtiń aıtýynsha, qutqarýshylar barlyǵy 46 oqıǵany tirkegen. Onyń 22-si tabıǵattyń tosyn minezinen bolǵan.
«Qar qursaýynan 300-den astam adamdy qutqardyq, 133 jeńil kólik pen 14 júk kóligin qaýipsiz jerge shyǵardyq. Oblys boıynsha úsh jylytý beketi jumys istedi. Eki jaǵdaıda adamdardy ótimdiligi joǵary tehnıkamen tasymaldaýǵa týra keldi. Onyń bireýinde er adamnyń júrek talmasy ustasa, ekinshisinde júkti áıelge jedel kómek qajet boldy. Oblys jáne respýblıkalyq mańyzy bar joldardyń 10 ýchaskesi borannyń saldarynan jabyldy», - dedi R.Jumaǵalıev.
Al «Novoıshımskoe» temirjol stansasynda elektrovoz ben joldy qardan arshıtyn lokomotıv soǵylyp qalǵan. Zardap shekkender joq. Biraq tótenshe jaǵdaıdyń saldarynan «Qostanaı-Qaraǵandy» jolaýshylar poıyzy úsh saǵatqa jolynan qaldy.
«Sınoptıkterdiń boljamynsha, aldaǵy aptada qar jaýyp, tuman túsedi. Boran soǵyp, ekpini sekýndyna 20-23 metrge deıin jetetin daýyl turmaq. Al kúndiz aýa temperatýrasy +4 gradýsqa deıin jylynsa, túnde -11 gradýsqa deıin sýytady», - dedi R.Jumaǵalıev.
