SQO-da elektrondyq qoltańbany zańsyz qoldanýdyń 100-den astam deregi anyqtaldy
PETROPAVL. KAZINFORM – Soltústik Qazaqstan oblysynda jyl basynan beri elektrondyq tsıfrlyq qoltańbany zańsyz qoldanýdyń 119 deregi anyqtaldy. Sonyń basym bóligi Jambyl aýdanynda tirkelgen.
SQO boıynsha memlekettik qyzmet departamentiniń málimetinshe, bıyl 29 qańtar men 16 aqpan aralyǵynda vedomstvo «Azamattarǵa arnalǵan úkimet» memlekettik korporatsııasy» KE AQ Jambyl aýdany fılıalynyń tirkeý jáne jer kadastry bólimin josparly teksergen. Nátıjesinde demalystaǵy qyzmetkerdiń elektrondyq tsıfrlyq qoltańbasyn zańsyz qoldanýdyń 96 faktisi anyqtaldy.
Al qalǵan 23 derek taldaý qorytyndysy boıynsha anyqtalǵan.
«Memlekettik qyzmet isteri agenttiginiń tapsyrmasyna sáıkes departament bıylǵy naýryzdan qyrkúıekke deıingi kezeńde memlekettik qyzmet nátıjesine qol qoıatyn laýazymdy tulǵalardyń ETsQ paıdalanýyna monıtorıng júrgizdi. Qyzyljar aýdany Prıbrejnyı aýyldyq okrýgi ákiminiń apparatynda eki fakti, Taıynsha aýdany ákimdiginiń sáýlet, qurylys, turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminde 8 fakt tirkelse, Tımırıazev aýdany ákimdiginiń aýyl sharýashylyǵy bóliminde 4 derek anyqtaldy. Petropavl men qalǵan birqatar aýdanda da zańbuzýshylyqtar bar. Budan bólek memlekettik qyzmetterdiń nátıjelerine basshynyń orynbasary, basshy retinde qol qoıǵan, keı jaǵdaıda birinshi basshy emes, onyń ornyna bas mamannyń qol qoıý deregi anyqtaldy. Osyndaı 301 fakt tirkeldi», - deıdi Memlekettik qyzmet isteri agenttiginiń SQO boıynsha departamenti memlekettik qyzmet basqarmasynyń bas mamany Nurgúl Janmurzına.
Aýyldyq ákimdikterde jumys ornynda joq nemese is saparǵa ketken ákimderdiń ornyna bas mamandar qol qoıyp kelgen.
Qashyqtan júrgizilgen monıtorıng nátıjesi boıynsha alty laýazymdy tulǵa tártiptik jaýapkershilikke tartyldy.
Kópshiligi zańbuzýshylyqtyń jasalǵanyna 2 aıdan artyq ýaqyttyń ótip ketýine baılanysty ákimshilik jazaǵa tartylmaǵan.
«Elektrondyq qujat jáne elektrondyq tsıfrlyq qoltańba týraly» Zańnyń 10-babyna sáıkes elektrondyq tsıfrlyq qoltańba qol qoıýshynyń óz qolymen jazǵanyna teń, sondyqtan zańdyq saldary birdeı. Budan basqa, laýazymdy adamdardyń elektrondyq tsıfrlyq qoltańbalaryn olar bolmaǵan kezeńde (demalys, issaparlar, eńbekke ýaqytsha jaramsyzdyq jáne t.b.) zańsyz paıdalaný «Memlekettik kórsetiletin qyzmetter týraly» Zańnyń 5-baby 2-tarmaǵynyń 1) tarmaqshasyn buzý bolyp esepteledi», - deıdi Nurgúl Janmurzına.
Buǵan deıin SQO-da aýdandyq bilim bóliminiń býhgalteri sottalǵanyn jazǵan edik.
