SQO-da elektr jelileri 80 paıyzǵa tozǵan

PETROPAVL. KAZINFORM – Soltústik Qazaqstan oblysynda bıyl elektr, jylý jáne sýmen jabdyqtaý máselelerin sheshý baǵytynda 25 joba júzege asyrylmaq. 

SQO ákimdiginde energetıka jáne turǵyn úı-kommýnaldyq sharýashylyǵy salasyna qatysty keńeıtilgen alqa otyrysy ótti. Byltyr atqarylǵan jumys qorytyndylandy, bıylǵa jospar naqtylandy.

– Turǵyn úı-kommýnaldyq sharýashylyǵy – turǵyndarymyzdyń ómir súrý sapasynyń negizi. Salanyń damytý úshin Memleket basshysy naqty mindetter qoıdy. Byltyr salany qarjylandyrý 30%-ǵa artty. 

Jylytý júıesi SQO úshin strategııalyq mańyzǵa ıe. Bıylǵy jylytý maýsymyna daıyndyq aıasynda 12,6 km jylý jelileri, 1 520 km elektr jelileri jáne 227 qosalqy stantsııa jańǵyrtyldy. Bul ınjenerlik ınfraqurylymnyń senimdiligin arttyryp, jylytý kezeńiniń turaqty ótýin qamtamasyz etti, - dedi oblys ákimi Ǵaýez Nurmuhambetov. 

Byltyr eldi mekenderdi taza sýmen qamtamasyz etý maqsatynda 30 joba júzege asyp, aýyz sý 140 aýylǵa, onyń ishinde 88-ine alǵash ret jetti. 

Salada áli de sheshilmegen máseleler bar. Oblysta elektar taratý jelileri 23 myń km sozylyp jatyr. Onyń 80%-y tozǵan. 

– Prezıdent 2030 jylǵa qaraı jelilerdiń tozýyn orta eseppen 40% deıin tómendetýdi tapsyrdy. Energetıka jáne kommýnaldyq sektordy jańǵyrtý ulttyq jobasy aıasynda bıyl jylytý boıynsha - 5, elektrmen jabdyqtaý boıynsha - 13 jáne sý jáne sýmen jabdyqtaý boıynsha 7 joba iske asyrylady. 2029 jylǵa deıin shamamen 3 myń km jeli jańartylady, - dedi óńir basshysy. 

Buǵan deıin SQO energetıka jáne TÚKSh basqarmasyna jańa basshy taǵaıyndalǵanyn jazǵan edik.