SQO-da elektr jelisine zańsyz qosylǵan turǵyn qomaqty aıyppul tóleıdi
PETROPAVL. QazAqparat – Soltústik Qazaqstan oblysy Penkovo eldi mekeniniń turǵyny bir jyl boıy elektr qýatyn zańsyz paıdalanǵany úshin qomaqty aıyppul tóleıdi, dep habarlaıdy QazAqparat tilshisi.
«Sevkazenergo» AQ baspasóz qyzmetiniń málimetinshe, energetıkter Qyzyljar aýdany Penkovo eldi mekeniniń turǵyny Valerıı Merkýshınniń elektr qýatyn urlaǵanyn anyqtap, onyń moınyna bir jylǵy tólemdi qaıta eseptep artqan. Munymen kelispegen tutynýshy elektrjelilik kompanııany sotqa berdi.
Energetıkter Merkýshınniń elektr qýatyn ruqsatsyz paıdalanyp jatqanyn tekseris barysynda anyqtaǵan. Ol ózdiginen úıi men qora-qopsysyn ortalyq jelige qosyp alypty. Sol jerde akt toltyrylyp, mamandar oǵan 650 myń teńge aıyppul saldy.
«Esepteý qurylǵysyna jalǵanǵan kabel bútin, esh jeri kesilip, qaıta jalǵanbaǵan bolýy shart. Tekseris barysynda biz bul kabeldiń zaqymdanǵanyn baıqadyq. Oǵan qosa, eseptegish qurylǵyǵa qosymsha sym jalǵap, ony úı men oramǵa jibergen. Bul azamat tehnıkalyq talaptardy buzyp qana qoımaı, elektr energııasyn tegin paıdalanǵan», - deıdi «Soltústik Qazaqstan Elektrjelilik Taratý kompanııasy» AQ bas dırektorynyń orynbasary Evgenıı Polıtkın.
Eki jaq birneshe ret sotta kezdesti. Sońǵy oblystyq sot úkimdi energetıkterdiń paıdasyna shyǵaryp, tutynýshyny 650 myń teńgeni tóleýge mindettedi.
«Mundaı keleńsiz jaǵdaılarǵa jol bermeý úshin tutynýshylar óz mindetterine jaýapkershilikpen qarasa eken deımiz. Elektr qýatyn paıdalaný tártibin buzýdyń sońy qaıǵyly aıaqtalýy múmkin», - dep eskertedi Evgenıı Polıtkın.
Bıyl SQO-da elektr energııasyn urlaýdyń 159 deregi anyqtaldy.
