SQO-da elektr qýatyn tóleı almaǵandardyń páteri aýktsıonǵa qoıyldy
PETROPAVL. QazAqparat - SQO-da elektr energııasyna qaryz bolyp qalǵan boryshkerlerdiń páterleri aýktsıonǵa qoıylyp jatyr, dep habarlaıdy «QazAqparat» HAA tilshisi.
«Sevkazenergo» AQ baspasóz qyzmetiniń málimetinshe, osydan birneshe kún buryn ǵana «Sevkazenergo» aldyndaǵy qaryzy 392 myńnan sál asatyn qaryzy bar adamnyń páteri satylyp ketken.
«Satylyp ketken páterdiń ıesi jınalǵan qaryzdy tóleýge sońyna deıin bas tartqan. Qazirgi ýaqytta sot oryndaýshylary taǵy eki páterdi saýdaǵa qoıyp otyr»,- dedi «Sevkazenergosbyt» JShS bas dırektorynyń m.a Maǵaýııa Saǵyndyqov.
Tutynýshylardyń 2018 jyldyń 1 qańtaryndaǵy debıtorlyq qaryzy 147,7 mln teńgege jetken.
«54 mıllıon teńgeniń 247 shaǵymy qazir qaralý ústinde. Boryshkerlerdiń múlkin saýdaǵa shyǵarý sırek kezdesetin jaǵdaı. Ádette olar qaryzdaryn erte jaýyp jatady»,-dedi baspasóz qyzmeti.
