SQO-da elektr energııasynyń baǵasy kóterilmek
PETROPAVL. QazAqparat - Petropavlda 2018 jylǵy 1 qańtardan bastap elektr energııasynyń tarıfin kóterý jónindegi másele talqylandy, dep habarlaıdy «QazAqparat».
SQO boıynsha tabıǵı monopolııalardy retteý jáne básekelestikti qorǵaý departameni basshysynyń mindetin atqarýshy Natalıa Shaıahmetovanyń aıtýynsha, «Solqazenergo» JShS qarashanyń aıaǵynda 2018 jylǵy 1 qańtardan bastap elektr energııasy shektik baǵasynyń kóterilýi týraly málimdegen.
«Elektr energııasynyń baǵasyn ortasha 15,97 teńgege arttyrý týraly málimdeme jasalǵan. Al qazirgi baǵa 14,62 teńgeni quraıdy, ıaǵnı baǵa ósimi 9,2% bolyp otyr. Departament baǵany arttyrý jónindegi jobany saraptamadan ótkizedi. Turǵyndardyń pikiri eskeriledi. Sodan keıin ortaq sheshim shyǵarylady», - deıdi Natalıa Shaıahmetova.
«Solqazenergo» JShS tarapy baǵany kóterýge negizdiń bar ekendigin alǵa tartyp otyr. «Aǵymdaǵy jyldyń 1 qańtarynan bastap elektr energııasyn jetkizip berýdiń quny artqanyn, al tarıf sońǵy ret 2016 jyldyń 1 qańtarynda ózgertilgen», - deıdi JShS bas dırektorynyń mindetin atqarýshy Maǵaýııa Saǵyndyqov.
Onyń sózine qaraǵanda kásiporyn 2015 jyldan beri 1 mlrd teńge zalal kórgen.
