SQO-da elektr energııasyn urlaǵandar 19 mln teńgeden astam shyǵyn keltirgen
PETROPAVL. KAZINFORM - Soltústik Qazaqstan oblysynda bıyl elektr energııasyn zańsyz paıdalanýdyń 14 deregi anyqtaldy.
Soltústik Qazaqstan elektr jelilerin taratý kompanııasysynyń málimetinshe, urlanǵan elektr energııasynyń kólemi 700 myń kılovatt-saǵattan asyp, keltirilgen shyǵyn kólemi 19 mln teńgeden asyp ketken.
- Mundaı zańbuzýshylyqtar tek energetıka salasyna ǵana emes, qarapaıym turǵyndarǵa da qaýip tóndiredi. Esepke alynbaǵan elektr energııasyn paıdalaný jelilerge artyq júkteme túsirip, apattyq jaǵdaılardyń, kerneý aýytqýlarynyń jáne órttiń týyndaýyna sebep bolýy múmkin. Kóbinese zań buzýshylar elektr jelilerine eseptegish quraldaryn aınalyp ótip qosylady, esepteý qurylǵylarynyń jumysyn nemese elektr symdarynyń shemasyn ózgertedi, - deıdi kompanııanyń elektr energııasyn taratý jáne baqylaý basqarmasynyń bastyǵy Sergeı Sharenkov.
Osyndaı bir tekserýlerdiń nátıjesinde elektr jelimin zańsyz paıdalanǵan turǵyn anyqtaldy. Endi ol energetıkterge 13 mln teńgeden astam bereshek, taǵy bir turǵyn 1 mln teńgeden astam qarjy tóleıdi.
- Qazirgi zamanǵy baqylaý júıeleri esepke alynbaǵan tutyný faktilerin dál anyqtaýǵa múmkindik beredi. Ol úshin arnaıy tehnıkalyq quraldar paıdalanylady. Olardyń qatarynda tok ólsheıtin qysqyshtar, energııa monıtorlary, kerneý kórsetkishteri, jasyryn elektr symdaryn anyqtaıtyn qurylǵylar jáne basqa da zamanaýı jabdyqtar bar. Sonymen qatar mamandar elektr eseptegishteriniń jadynda saqtalǵan málimetterdi zerttep, júktemeniń eń joǵary deńgeılerin taldaıdy. Eseptegish qurylǵylardyń ashylǵan-ashylmaǵanyn anyqtaý úshin arnaıy oqıǵalar jýrnaly da tekseriledi, - deıdi energetıkter.
Mamandardyń aıtýynsha, budan bólek, transformatorlyq qosalqy stantsııalarda ornatylǵan tehnıkalyq esepteý quraldary arqyly jelige berilgen jáne tutynylǵan elektr energııasy salystyrylyp otyrady. Bul ádister «urylardy» joǵary dáldikpen anyqtaýǵa múmkindik beredi.
Qoldanystaǵy zańnamaǵa sáıkes elektr energııasyn zańsyz paıdalanǵandarǵa ákimshilik jaýapkershilik qarastyrylǵan. Aıyppul 50-500 AEK mólsherinde, ıaǵnı, bul - 216 myń teńgeden 2 mln 162 myń teńgege deıingi shamada.
Buǵan deıin Qazaqstanda bıylǵy alǵashqy bes aıdyń qorytyndysy boıynsha elektr energııasyn óndirý kólemi tutyný mólsherinen asqanyn jazǵan edik.
