SQO-da eldi mekender arasyndaǵy avtobýs bıleti qymbattaýy múmkin
SQO-nyń qoǵamdyq keńesinde óńirdiń qoǵamdyq kóliginiń jumysy talqyǵa tústi. Oblystyń Jolaýshylar kóligi jáne avtomobıl joldary basqarmasynyń basshysy Maqsat Baıahmettiń aıtýynsha, búgingi tańda óńirde 123 avtobýs baǵyty bar. Onyń 19-y – qalaishilik.
«100-den artyq turǵyny bar 443 eldi meken bolsa, sonyń 371-ine avtobýs qatynaıdy. Byltyr 19 aýylǵa qoǵamdyq kólik júre bastady.
Qalǵan aýyldarǵa avtobýs jiberý tıimsiz, bul – janar-jaǵarmaıdyń, qosalqy bólshekterdiń qymbattaýymen jáne jol aqysynyń arzan bolýymen baılanysty», - deıdi Maqsat Baıahmet.
Byltyr oblys ishinde júretin 43 baǵyt sýbsıdııalanyp, osy maqsatqa 802,5 mln teńge bólindi. Bir jyl ishinde 567 myńnan astam jolaýshy tasymaldanǵan, bul 2021 jylmen salystyrǵanda 225% kóp.
Bıyl, mamannyń aıtýynsha, 46 avtobýstyq baǵytqa 361 mln teńge sýbsıdııa bólindi, áli 566 mln teńge kerek.
«Halyqty turaqty avtobýs marshrýttarymen qamtý maqsatynda oblys ákimdigi 2017 jyldan bastap áleýmettik mańyzy bar baǵyttarǵa qyzmet kórsetetin tasymaldaýshylardyń shyǵynyn ótep jatyr, búgingi tańda 371 aýyldyń turǵyndary áleýmettik mańyzy bar tarıf boıynsha júredi.
Alaıda, osy aralyqta tasymaldaýshylardyń shyǵyny 2-3 esege ulǵaıdy. Mysaly, dızel otyny 130 teńgeden 260 teńgege deıin qymbattady, benzın baǵasy ósti, sondaı-aq avtobýstardyń ózi 2017 jylmen salystyrǵanda 3 esege qymbattady», - deıdi basqarma basshysy.
Sondyqtan jolaýshy tasymaldaýshylar ár kılometr úshin tarıfti 2 teńgege qymbattatýdy surap otyr. Aıtýlarynsha, bul jańa áleýmettik mańyzy bar baǵyttardy ashýǵa múmkindik bermek.
«Tarıfti ósirý boıynsha qaýly jobasy daıyn, ol eksperttik keńesten ótip, SQO qoǵamdyq keńesiniń qoldaýyna ıe boldy. Qazirgi ýaqytta oblystyq máslıhat depýtattarynyń kelisimi kútilýde», - deıdi Maqsat Baıahmet.
