SQO Polıtsııa departamenti baspasóz qyzmetiniń málimetinshe, Qazaqstanda tyıym salynǵan «Ata Joly» okkýlttik-mıstıkalyq dinı aǵymdy ustanýshy – Petropavl qalasynyń eki turǵyny jurtqa dástúrli emes emdeý qyzmetin kórsetken. Seansqa kelgenderdi arýaq shaqyryp emdeımin dep ýáde etken eki áıel endi 50 AEK mólsherinde aıyppul tóleıdi.

«YouTube» vıdeohostıngine monıtorıng júrgizý barysynda dinı sıpattaǵy beınematerıaldardy taratýdyń deregi anyqtaldy. Osyǵan baılanysty Petropavl qalasynyń 50 jastaǵy turǵynyna qatysty ákimshilik materıal jınaldy. Mamandandyrylǵan ákimshilik sottyń sheshimimen oǵan dinı ádebıetti jáne dinı mazmundaǵy basqa materıaldardy taratýǵa úsh aı shekteý qoıyldy jáne 132 myń teńgeden astam mólsherde aıyppul salyndy.

Polıtsııa qyzmetkerleriniń aıtýynsha, «Dinı qyzmet jáne dinı birlestikter týraly» QR Zańyna sáıkes dinı ádebıetti, dinı mazmundaǵy ózge de aqparattyq materıaldardy, dinı maqsattaǵy zattardy tek qana ǵıbadat úılerinde, dinı bilim berý uıymdarynda, sondaı-aq jergilikti atqarýshy organdar arnaıy belgilegen turaqty úı-jaılarda taratýǵa bolady.

«Bul baǵyttaǵy jumys júıeli túrde jalǵasady. Jyl basynan anyqtalǵan 7 fakti boıynsha 6 adamǵa 50-den 100-ge deıingi AEK mólsherinde ákimshilik aıyppul salyndy. Bir materıal saraptamaǵa jiberildi», deıdi SQO PD EQІQB bastyǵynyń mindetin atqarýshy Almas Shıtqanov.