SQO-da eldi mekender arasynda úılerin jańajyldyq bezendirýden baıqaý ótip jatyr
PETROPAVL. KAZINFORM — Soltústik Qazaqstan oblysynda jańa jyl merekesi qarsańynda eldi mekender arasynda úılerdi bezendirýden dástúrli baıqaý uıymdastyryldy. Bul ıgi bastamaǵa shaǵyn aýyldardyń turǵyndary da belsene qatysyp jatyr.
Esil aýdanyndaǵy Zagradovka eldi mekeni — solardyń qatarynda. Ásirese keshke aýyl erekshe qalypqa enip, túrli-tústi shamdarmen kómkerilgen úıler turǵyndar men qonaqtarǵa kóterińki kóńil kúı syılaıdy.
Aýyl turǵyny Dmıtrıı Blank otbasy múshelerimen birge úıin birneshe kún ishinde bezendirip shyqqan.
— Úsh-tórt kúnde barlyq jumysty aıaqtadyq. Jubaıym, 9-synypta oqıtyn 15 jastaǵy ulym — barlyǵymyz birge ádemiledik. Jańa jyl qarsańynda úıimizdi bezendirýdi dástúrge aınaldyrǵanbyz. Bıyl shamamen besinshi jyl. Buǵan deıin birneshe ret aýdan boıynsha birinshi oryndy ıelendik, — deıdi ol.
Dmıtrıı Blank jergilikti sharýashylyqta agronom bolyp eńbek etedi, al jubaıy Ekaterına — úı sharýasynda. Otbasy jylda onyń aldyndaǵyǵa qaraǵanda sándirek etip bezendirýge tyrysady. Osy maqsatta bıyl da qosymsha gırlıandalar satyp alyp, aýlaǵa janýarlar músinderin ornatqan.
— Jańa jyl — eń súıikti otbasylyq merekemiz. Sondyqtan oǵan aldyn ala daıyndalamyz. Úıdi bezendirip qana qoımaı, syılyqtardy oılastyryp, merekelik dastarhan mázirin quramyz. Mindetti túrde jańa jylǵa tilek tileımiz, — deıdi Dmıtrıı Blank.
Esil aýdanynyń ákimi Mereke Muhamedııarovtyń aıtýynsha, jańa jyl qarsańynda aýdan ortalyǵy men aýyldarda úıler men oǵan irgeles aýmaqtardy bezendirý boıynsha arnaıy baıqaý jarııalanǵan.
— Zagradovka aýylynyń turǵyndary bul bastamany erekshe yqylaspen qoldady. Qazirdiń ózinde aýyl ertegi álemine engendeı áser qaldyrady. Túrli-tústi shamdarmen bezendirilgen úıler túngi ýaqytta erekshe jarqyrap, merekelik kóńil kúı syılaıdy. Mundaı dástúr turǵyndardy biriktirip, qýanysh syılaıdy, — dedi aýdan ákimi.
Buǵan deıin jańa jyl qarsańynda elordada 40-tan astam shyrsha shamyn jaqqanyn jazǵan edik.