SQO-da «Elbasy izimen» atty ekskýrsııa ótti
Іs-sharaǵa SQO ákiminiń orynbasary Ǵanı Nyǵymetov, jastar uıymdarynyń ókilderi, volonterlik qozǵalystardyń kóshbasshylary jáne óńirdiń belsendi jastar qatysty. Ekskýrsııa oblystyq tarıhı-ólketaný murajaıynan bastaldy. Munda Elbasynyń ǵıbratty ǵumyryna arnalǵan zal bar. Bul jerde jastar Nursultan Nazarbaevtyń balalyq shaǵynan bastap, kemeline kelgen shaǵyna deıin qyzyqty aqparat aldy.
Keıin «Elbasy izimen» ekskýrsııasyna qatysýshylar Tuńǵysh Prezıdent parkine bardy, Abylaı han rezıdentsııasy mýzeı keshenin aralady. Nazarbaev zııatkerlik mektebinde, botanıkalyq baqta jáne Dostyq úıinde bolyp, fotokórmemen tanysty.
«Qazaqstan Respýblıkasy Táýelsizdiginiń 30 jyldyǵynda jáne Tuńǵysh Prezıdent kúni qarsańynda men sizdermen birge egemendi elimiz tarıhynyń betterin paraqtaı otyryp, Elbasynyń izimen júrip ótýge tamasha múmkindik aldym. Sizderdiń árqaısylaryńyz oń ózgeristerdi, kreatıvtilik pen bastamalardy jaqtaıtyn óz Otanynyń laıyqty azamaty ekendikterińizge senimdimin. Elbasy - zamanaýı Qazaqstan memleketiniń negizin qalaýshy, qazaqstandyq damý úlgisiniń avtory, Táýelsizdik sáýletshisi jáne jastardy rýhtandyratyn tulǵa. Elimizdiń qarqyndy damýy men oń saıası ózgerister Nursultan Ábishuly Nazarbaevtyń kóp jylǵy eńbeginiń jáne syndarly saıasatynyń arqasynda múmkin boldy», - dep atap ótti Ǵanı Nyǵymetov óz sózinde.
Kezdesýge qatysýshylar Nursultan Nazarbaevtyń mańyzdy bastamalary týraly pikirlerimen bólisti, respýblıkamyzdaǵy jastardyń róli jáne jaqyn bolashaqqa degen oılary týraly aıtty.
Kezdesý sońynda Ǵanı Nyǵymetov jas soltústikqazaqstandyqtarǵa shyǵarmashylyq tabys, jarqyn jetistikter, jańa jeńister tiledi.
