SQO-da el kezip, urlyq jasap júrgen gastroler ustaldy

PETROPAVL. QazAqparat – Soltústik Qazaqstan oblysynda polıtseıler el kezip, urlyq jasap júrgen er adamdy ustady. Onyń kóliginen qoldy qylǵan aqsha tabyldy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, Ǵabıt Músirepov atyndaǵy aýdanda polıtseıler jolda, óńir-óńirdi aralap, urlyq jasap júrgen qaraqshyny ustady. 37 jastaǵy qazaqstandyq Petropavlda da aram oıyn júzege asyryp, kóligimen basqa qalaǵa bet alǵan eken.

Kúdikti ótken aptada Petropavldaǵy býtıkterdiń biriniń ıesinen 600 myń teńgeden asa aqshasy bar ámııanyn urlap ketken. Jábirlenýshi birden polıtsııaǵa aryzdanyp, qalalyq Polıtsııa basqarmasynyń jedel qyzmetkerleri qaskóıdiń izine tústi. Uryny anyqtaýǵa saýda úıindegi beınebaqylaý kameralary da kómektesken.

Baǵdar barlyq beketterge jiberilip, patrýldik polıtsııa batalony men aýmaqtyq bólisterdiń qyzmetkerlerine tapsyrma berildi.

Kúdikti SQO aýmaǵynan shyǵa almady. Polıtseıler ony keshke qaraı «izin sýytpaı» Novoıshımskoe aýylynan shyǵar jerde ustady.

«Ustalǵan adamnyń mashınasynan urlanǵan aqsha tabyldy. Qazirgi ýaqytta kúdikti qamaýǵa alyndy. Urlyq faktisi boıynsha sotqa deıingi tergeý júrgizilip jatyr», - deıdi Petropavl qalasy Polıtsııa basqarmasy anyqtaý bóliminiń bastyǵy Mahabbat Abjanova.