SQO-da eksport ónimin ótkizýdiń geografııalyq aýmaǵy keńeıdi
SQO kásipkerler palatasy baspasóz qyzmetiniń málimetinshe, jyl basynan beri óńirde kásipkerlerge taýardyń shyqqan túbin rastaıtyn 2504 sertıfıkaty berilgen, bul ótken jyldyń osy kezeńimen salystyrǵanda 10 %-ǵa artyq.
SQO kásipkerleri Ózbekstanǵa bıdaı, kebek jáne bıdaı krahmalyn, Qyrǵyzstan, Tájikstan men Reseıge bıdaıdy dástúrli túrde eksporttaıdy. Jalpy ónim eksportynda Reseıdiń úlesi joǵary, shetelge otandyq makaron ónimderi, muzdatylǵan jartylaı fabrıkattar, muzdatylǵan balyq, sút ónimderi, bıdaı glıýteni, bıdaı krahmaly, zyǵyr, raps jáne soıa jiberiledi. Ýkraınaǵa qaraqumyq, bıdaı krahmaly, jasymyq jáne zyǵyr eksporttalady. Sondaı-aq, jyl basynan beri túrli taýar Eýroodaq elderine saýdalandy. Iranǵa arpa, bıdaı, Aýǵanstanǵa – un, taýyq jumyrtqasy, Qytaıǵa – bıdaı jáne zyǵyr maıy, Túrkııaǵa – qatty bıdaı men jasymyq jetkizildi.
«Bul atalǵan elderdiń barlyǵymen soltústikqazaqstandyq kásipkerler burynnan baılanys ornatqan. Bıyl eksporttalatyn ónim aýmaǵy keńeıgen. Máselen Mońǵolııaǵa makaron ónimderin jiberýdi bastadyq. Al Eýropa elderi – Belgııa, Polsha, Chehııa, Latvııa men Lıtvaǵa jergilikti kásiporynnyń fanerasyn jóneltip jatyrmyz. Budan basqa Japonııaǵa alǵash ret qorǵasyn eksporttala bastady, buryn ony tek AQSh-qa ǵana jiberetinbiz», - deıdi SQO kásipkerler palatasynyń Taýarlardyń shyǵý túbin sertıfıkattaý jónindegi mamany Amangeldi Qalıev.
Óńirlik kásipkerler palatasynda taýar óndirýshiler sertıfıkattardyń birneshe túrin resimdeı alady.
«Máselen, «ST-KZ» úlgisindegi sertıfıkat taýardyń shyǵarylǵan elin rastaý úshin ǵana emes, sondaı-aq memlekettik satyp alýlar boıynsha baıqaýlarǵa qatysýshylar úshin qajet. Budan bólek, eksportqa sertıfıkattar beriledi. «ST-1» sertıfıkaty TMD aýmaǵynda jaramdy. «A» úlgisindegi sertıfıkat kásipkerlerge Eýrodaqqa múshe birneshe elde jeńildikter beredi. Ózbekstanǵa «ST-1» úlgisinde jeke sertıfıkat bar. Osyndaı taǵy birneshe sertıfıkat bar», – deıdi Amangeldi Qalıev.
Mamannyń aıtýynsha, keıbir eksporttyq sertıfıkattar olardyń ıelerine ımport elinde artyqshylyq beretinin, al keıbireýleri qazaqstandyq taýardyń shyǵý túbin ǵana rastaıtynyn atap ótti. Máselen, jyl basynan beri SQO óńirlik palatasy shetelge jiberilgen taýarǵa resimdelgen 2127 sertıfıkat berdi. Qazirgi ýaqytta kásipkerler ST-KZ úlgisinde 377 sertıfıkat aldy.
«Óndirýshiler men júk jóneltýshilerden kúnde ótinim túsedi. Eksport geografııasy týraly aıtatyn bolsaq, onyń aýqymy keń. Oblysta «ST-1» úlgisinde 667 sertıfıkat Tájikstan, Reseı Federatsııasy, Belarýs Respýblıkasy, Ýkraına, Qyrǵyzstan jáne Túrkimenstan baǵytyna berildi. 608 sertıfıkat Ózbekstan baǵytyna resimdeldi. Jyl basynan beri biz 692 «túpnusqa» sertıfıkatyn berdik. Bul sertıfıkat Eýroodaq elderinde qoldanylady», – deıdi maman.
Amangeldi Qalıevtiń aıtýynsha, ótken jyldyń 1 mamyrynan bastap «A» úlgisindegi sertfııkatty eki el – Norvegııa men Shveıtsarııa qabyldamaıdy. Osy elde tarıftik jeńildik alý úshin kásipkerler REX júıesine tirkelip, tirkeý nómirin alý qajet.