SQO-da ekologııalyq qaýipsiz jylý qazandyqtary ornatylyp jatyr
SQO boıynsha ekologııa departamenti 2020-2025 jyldarǵa arnalǵan óńirdegi ekologııalyq problemalardy keshendi sheshý Jol kartasynyń tarmaqtaryn iske asyrý boıynsha jıyn ótkizdi. Tarmaqtyń biri – aýa qabatyn lastaıtyn zııandy zattardyń taralýyn azaıtýǵa arnalǵan.
Sońǵy eki jylda oblysta bıomassada jumys isteıtin 50 qazandyq ornatyldy. Sonyń biri Aıyrtaý aýdany Aryqbalyq aýylynda jumys istep tur. Bloktyq-modýldik qazandyq satyp alynyp, ornatyldy. Qazandyqtyń jalpy qýaty 4 Gkal/saǵ.
Bıylǵy jylytý maýsymynda bul qazandyq jumys kúshi artyq óńirlerden qonys aýdarǵan azamattar turatyn jeke 10 turǵyn úıdi, eki qabatty úsh úıdi jáne áleýmettik nysandardy – mektep, aýrýhana, polıtsııa ǵımaratyn, aýyl ákimdigin jáne qyzmet kórsetý nysandaryn jylytady.
Al Soltústik Qazaqstan oblysyndaǵy jylý elektr ortalyǵynyń ıesi «Sevkazenergo» AQ qorshaǵan ortaǵa taraıtyn zııandy zattardyń mólsherin azaıtý úshin 2021 jyly 401,4 mln teńge bóldi. Nátıjesinde kómirdi tutyný 25,48 myń tonnaǵa deıin azaıtyldy.
Qomaqty somaǵa qazandyq agregattarynyń qyzdyrý beti qalpyna keltirildi. Ol shyǵatyn gazdardaǵy lastaýshy zattardy tıimdi tazartýdy, kádege jaratýdy, beıtaraptandyrýdy, basýdy jáne zalalsyzdandyrýdy qamtamasyz etedi. Qorshaǵan ortaǵa emıssııany tómendetý jospar boıynsha 270 tonna bolsa, atqarylǵan jumys nátıjesinde ol 462,3 tonnaǵa jetti.
Byltyr kompanııa qazandyq agregattarynyń qyzdyrý betterin qalpyna keltirý maqsatynda №4,5,7,8,9,12 qazandyq agregattaryna jóndeý jumystaryn júrgizdi. Osylaısha kómir tutynýdy 26,3 tonnaǵa deıin azaıtty.
Ekologtardyń aıtýynsha, byltyr óńirde qýattylyǵy 50 MVt bolatyn jelelektrstansasy paıdalanýǵa berilýi tıis edi. Alaıda ony Aıyrtaý aýdany Saýmalkól aýylynda ornatýy tıis «Energo trust» JShS jobany merziminde aıaqtamady. Endi ony kórshi Aqmola oblysyna kóshirýdi josparlaǵan.
