SQO-da ekologııalyq aktsııa aıasynda 306 tonna qoqys jınaldy
PETROPAVL. QazAqparat – Soltústik Qazaqstan oblysynda ekologııalyq senbilik ótip, eki myńnan astam adam 306 tonna qoqys jınady, dep habarlaıdy QazAqparat tilshisi.
SQO boıynsha Ekologııa departamentiniń málimetinshe, senbilik «World cleanup day 2022» halyqaralyq dástúrli aktsııasy aıasynda ótti. Oǵan jyl saıyn 180-nen astam el, keminde 18 mln adam qatysady. SQO-da is-shara «Birge Taza Qazaqstan» ataýymen uıymdastyryldy. Oǵan departamenttiń mamandary, aımaqtyń atqarýshy organdardyń, kásiporyndardyń ókilderi, ekobelsendiler qatysty.
«Jyl saıyn osy aktsııadan shet qalmaımyz. Bul óte kerek is-shara. Bıyl Petropavlda ekosenbilik barysynda 5 aýmaqty qamtydyq. Olardyń ishinde Pestroe kóliniń jaǵalaýy, ortalyq saıabaq jáne «Jeńis» saıabaǵy bar. Aýdandar da bul jumystan shet qalmady. Maqsatymyz - qystyń aldynda jaǵalaýlardy, saıabaqtar men skverlerdi qoqystan tazartý. Jınalǵan qoqysty suryptap, qaıta óńdeýge jóneltemiz», - deıdi SQO boıynsha Ekologııa departamentiniń basshysy Azamat Bektasov.
Bul joly senbilikke 2 myńnan astam adam qatysty. Nátıjeli jumys isteýge aýa raıy da qolaıly boldy. Іs-shara barysynda 306 tonna qoqys jınaldy. Onyń ishinde 26,2 tonna shyny, 15,8 tonna plastık, 14,55 tonna rezeńke, 18,95 tonna qaǵaz, 44,5 tonna metall. Qaıta óńdeletin qaldyqtar kásiporynǵa qaıta óńdeýge jiberildi.
