SQO-da ekologııa talaptaryn buzǵan ákimdikke 2,5 mln teńge aıyppul salyndy
Soltústik Qazaqstan oblysynda bıyl ruqsaty joq 200-ge jýyq qoqys polıgony anyqtaldy, taǵy 76-synyń shekarasy zańsyz keńeıgen. Al jospardan tys tekserý kezinde anyqtalǵan olqylyqtar úshin eki aýyldyq ákim jazalandy, dep habarlaıdy Kazinform.
SQO boıynsha ekologııa departamentiniń basshysy Azamat Bektasovtyń málimetinshe, Aqqaıyń aýdany Smırnov aýyldyq okrýgi men Aqjar aýdany Qýlykól aýyldyq okrýgi ákimdikterine kelip túsken ótinishter negizinde tekserýler júrgizildi. Mamandar qatty turmystyq qaldyqtardy ornalastyrýǵa qatysty ekologııalyq zańnama talaptarynyń saqtalýyn qadaǵalady.
Nátıjesinde zań buzýshylyqtar úshin jalpy somasy 2,6 mln teńgeden asatyn aıyppul salyndy.
«Smırnov aýyldyq okrýginde ekologııa talaptarynyń birneshe márti buzylǵandyǵy anyqtaldy. ıAǵnı qaldyqtardy jınaý jáne kómý kezinde sanıtarııalyq-epıdemıologııalyq jáne ekologııalyq talaptar buzylǵan. Memlekettik ekologııalyq saraptamany mindetti júrgizý týraly QR zańnamasynyń talaptary oryndalmaǵan. Qaldyqtardy ekologııalyq ruqsatsyz úıip-ornalastyrýǵa jol berilgen.
Osyǵan baılanysty laýazymdy tulǵa –Smırnov aýyldyq okrýginiń ákimine QR Ákimshilik quqyq buzýshylyq týraly kodeksiniń 324-babynyń 1-bóligi, 332-babynyń 1-bóligi boıynsha jalpy somasy 198 375 teńge aıyppul salyndy», - deıdi Azamat Bektasov.
Sondaı-aq QR ÁQBtK-niń 328-babynyń 4-bóligi «Qorshaǵan ortaǵa jol beriletin antropogendik áser etý normatıvterin buzý» boıynsha Aqqaıyń aýdandyq sotynyń qaýlysymen aýyldyq okrýg ákimi apparatyna 700 AEK - 2 383 500 teńge mólsherinde aıyppul salyndy.
Aqjar aýdany Qýlykól aýyldyq okrýgi aýmaǵynda qaldyqtar orny paıda bolǵan. Osy zań buzýshylyq úshin Qulykól aýyldyq okrýginiń ákimine 25 875 teńge aıyppul salyndy. Sondaı-aq olqylyqty joıýǵa nusqama berildi.
Jalpy bıyl SQO aýmaǵynda 200-ge jýyq qoqys polıgony anyqtaldy, taǵy 76-synda qaldyqtar shekara syrtyna tógilgen. Olardyń basym bóligi joıyldy.
