SQO-da eki jyl qatarynan qyzylshamen syrqattaný tirkelmegen
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, óńirde qyzylshamen sońǵy ret 2020 jyly 14 adam aýyrǵan.
Qyzylsha – qaýipti dertterdiń biri. Infektsııa adamnan adamǵa juǵady. Qyzylshamen aýyrǵan adamnyń temperatýrasy 38-40° C deıin kóteriledi. Eń basty belgisi – denede bórtpe paıda bolady. Syrqatta álsizdik, bas aýrýy bolyp, tábeti tómendeıdi, uıqysy buzylady.
«Qyzylshamen syrqattanǵan kezde kúrdeli asqynýlar paıda bolýy múmkin. Ondaıda ókpe nemese ortańǵy qulaq qabynady. Keı jaǵdaıda entsefalıt (mıdyń qabynýy) bolýy múmkin. Qyzylshamen aýyryp saýyqqannan keıin 2 aıǵa deıin ımmýnıtet tómendeıdi. Sondyqtan da bala qandaı da bir sýyq tııý nemese vırýstyq aýrýmen aýyrýy múmkin, sol sebepti ony shamadan tys júktemeden, múmkindiginshe naýqas balalarmen qarym-qatynastan qorǵaý qajet», - deıdi SQO sanıtarııalyq-epıdemıologııalyq baqylaý departamentiniń bas mamany Aınash Saǵandyqova.
Eger adam qyzylshamen aýyrmaǵan bolsa jáne osy ınfektsııaǵa qarsy egilmese, onda naýqaspen baılanysta bolǵannan keıin 100 % jaǵdaıda juqtyrady.
«Qyzylshamen aýyrǵan naýqas aınalasyndaǵylar úshin 7-10 kún boıy qaýipti. Al aýyryp, saýyqqannan keıin adamdarda ómir boıyna ımmýnıtet paıda bolady. Qyzylshamen qaıtalap syrqattaný jaǵdaıy óte sırek kezdesedi.
Aýrýdan qorǵanýdyń birden bir joly Ulttyq egýler kúntizbesine engizilgen qyzylshaǵa qarsy vaktsına alý. Ata-analar balalarynyń qyzylshaǵa qarsy ekpe alǵan-almaǵanyn tekserip, vaktsınatsııa bolmaǵan jaǵdaıda profılaktıkalyq egý jasatýy tıis», - deıdi maman.
Al qyzylshanyń alǵashqy belgileri paıda bolǵan jaǵdaıda birden dárigerge kóringen jón. Asqynǵan jaǵdaıda jedel járdem qyzmetin shaqyrtý kerek.
«Infektsııaǵa qarsy kúrestiń eń qoljetimdi jáne tıimdi ádisi – vaktsınatsııa. Profılaktıkalyq egýlerdiń ulttyq kúntizbeligine sáıkes balalardy qyzylshaǵa qarsy josparly vaktsınatsııalaý 12 aılyq kezinde jáne qaıtalap 6 jasta júrgiziledi. Qyzylshaǵa qarsy vaktsınalar 20 jylǵa deıin saqtalatyn ımmýnıtetti qalyptastyrady. Vaktsınatsııa epıdemııalyq jaǵdaıdyń nasharlaýy kezinde jasalsa da, qyzylshanyń damýyna jol bermeıdi», - deıdi Aınash Saǵandyqova.