SQO-da eki júzden astam dáriger jetispeıdi
PETROPAVL. QazAqparat - SQO-da 226 dáriger jetispeıdi. Onyń 76-sy aýyldyq jerlerge qajet, dep habarlaıdy QazAqparat tilshisi.
Bul jaıynda SQO ákimdiginiń otyrysynda belgili boldy. Densaýlyq saqtaý basqarmasynyń málimetinshe, óńirde 28 terapevt, 27 jalpy tájirıbe dárigeri, 21 pedıatr, 15 anestezıolog-reanımatolog, sondaı-aq akýsher-gınekologtar, hırýrgter, dáriger-zerthanashylar jetispeıdi.
Byltyr aýyldyq jerlerge kelgen 40 mamanǵa oblystyq bıýdjetten 1,5 mln teńgeden tólengen. Budan basqa olarǵa 168 myń teńgeden kóterme aqy beriledi (qalada 481 myń teńge). Úı salýǵa nemese satyp alýǵa 3,6 mln teńge bıýdjettik nesıe qarastyrylǵan. Petropavldaǵy «Dárigerler úıinen» 96 medıtsınalyq qyzmetkerge baspana berilgen. Aýyldyq jerlerde 15 dáriger turǵyn úımen qamtylyp otyr.
Astana jáne Qaraǵandy medıtsınalyq joǵary oqý oryndarynyń 56 túlegimen SQO jumysqa kelý týraly kelisimge qol qoıyldy.
«Aýdan ákimderi bas dárigerlermen birlese jumys atqarýy qajet. Aýyldarda dárigerlerge, sonyń ishinde aıasy tar maman-dárigerlerge baspana berilsin. Aýdan ákimderiniń jumysyn 3 toqsanda dárigerlerdi eldimekenderge tartýy boıynsha baǵalaıtyn bolamyz»,- dedi Densaýlyq saqtaý basqarmasy basshysynyń esebin tyńdaǵan oblys ákimi Qumar Aqsaqalov.
Densaýlyq saqtaý basqarmasynyń basshysy Tımýr Sultanǵazıevtiń aıtýynsha, 13 aýdandyq aýrýhananyń tek bireýinde ǵana shtattyq qyzmette kardıolog jumys istep jatyr. Qalǵandarynda kardıologtyń mindetin osy mamandyq boıynsha jarty jyldyq qaıta daıarlyqtan ótken basqa sala dárigerleri qosa atqaryp júr.
Jalpy, byltyr soltústikqazaqstandyqtarǵa memlekettik medıtsınalyq uıymdarda 1,5 myń dáriger men 5 myńnan astam orta medıtsınalyq qyzmetker medıtsınalyq kómek kórsetipti.
