SQO-da eki jigit sýǵa ketken er adamdy qutqaryp qaldy
PETROPAVL. QazAqparat – Soltústik Qazaqstan oblysynda eki jigit Esil ózenine batyp bara jatqan er adamdy alyp shyǵyp, ómirine arasha tústi, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, oqıǵa 27 maýsym kúni Qyzyljar aýdanynyń Novonıkolskoe eldi mekeninde bolǵan. Esil ózenine sýǵa shomylýǵa barǵan 50 jastaǵy turǵyn sýǵa batyp ketken. Ony sol mańda júrgen eki jigit baıqap qalady.
«Er adam súńgigendeı boldy, biraq sý betine shyqpady. Birden kómekke umtyldyq. Ony birinshi bolyp Evgenıı tapty. Ekeýlep jaǵaǵa súırep shyǵardyq. Er adamda tirshilik belgisi bolmady, kógere bastady. Alǵashqy medıtsınalyq kómek kórsetip, jasandy dem alǵyzdyq», - deıdi Novonıkolskoe eldi mekeniniń turǵyny Denıs Aletskıı.
Jigitterdiń qasynda bolǵan boıjetken de ýaqyt ozdyrmaı «112» qyzmetine habarlasyp, bolǵan jaıtty aıtqan. Qutqarýshylar aýyldyq okrýg ákimine baılanysyp, ol óz kezeginde oqıǵa ornyna jedel járdem qyzmetin jiberdi.
Medıtsına qyzmetkerleri zardap shegýshini qarap, oblystyq aýrýhanaǵa jetkizdi. Qazir er adamnyń jaǵdaıy qalypty, em alyp jatyr.
Al onyń qutqarýshylary Novonıkolskoe aýylynyń 37 jastaǵy turǵyny Denıs Aletskıı men Bolshaıa Malyshka eldi mekeniniń 31 jastaǵy turǵyny Evgenıı Osıpovke bastaryn qaterge tigip, sýǵa ketken er adamdy alyp shyqqandary úshin SQO TJD alǵys bildirdi.
