SQO-da eki turǵyn jaqtyrmaıtyn tanysynyń qysqa jınaǵan shóbin órtep jiberdi
PETROPAVL. QazAqparat – Soltústik Qazaqstan oblysynda Chernobaevka aýylynyń eki turǵyny jaqtyrmaıtyn tanysynyń 25 tonna shóbin qasaqana órtep jiberdi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oqıǵa Ǵabıt Músirepov atyndaǵy aýdannyń Chernobaevka eldimekeninde bolǵan. 37 jastaǵy turǵynnyń baqshasynda jatqan 25 tonna shóbi janyp ketti. Kelgen shyǵyn – 600 myń teńgeden asady.
Aýyl turǵyny polıtsııaǵa júginip, shóptiń qasaqana órtelgendigi anyqtaldy. Jedel-tergeý toby ýchaskelik polıtsııa ınspektorynyń kómegimen osy iske qatysy bolýy múmkin sol aýdannyń 31 jastaǵy eki turǵynyn ustady. Kúdiktiler jasaǵan qylmystaryn moıyndady. Aıtýlarynsha, olar sol kúni spırttik ishimdik ishken. Araqtyń býymen, jaqtyrmaıtyn tanystaryna zııan keltirmek bolady. Osylaısha baqshada turǵan shópke ot qoıǵan.
Atalǵan derek QR Qylmystyq kodeksiniń «Bótenniń múlkin qasaqana joıý nemese búldirý» baby boıynsha Sotqa deıingi tergep-tekserýdiń biryńǵaı tizilimine engizildi. Kúdiktilerge qatysty kelýi týraly mindetteme túrindegi májbúrleý sharasy qoldandy.
«QR QK 202-babynyń 2-bóligi órt qoıý, jarylys jasaý arqyly nemese ózge de jalpy qaýipti tásilmen jasalǵan is-áreketti qarastyrady. Sol kúni úıde otbasy músheleri tolyq úıde bolǵan. Órt qora-qopsyǵa, úıge taraǵan joq. Órt sóndirýshiler órtti sóndirip úlgerdi», - deıdi Ǵ.Músirepov atyndaǵy aýdannyń PB bastyǵy Marat Áljanov
