SQO-da eki kúnniń ishinde 87 sheteldik ýaqytsha turýǵa ruqsat aldy
PETROPAVL. QazAqparat – Soltústik Qazaqstan oblysynda 13 mamyrdan kóshi-qon qyzmeti iske kirisip, halyqqa jańa keste boıynsha qyzmet kórsete bastady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 8 myńǵa jýyq óńir turǵyny karantındik shekteýlerge baılanysty jeke kýáligin merziminde resimdeı almaǵan. Onyń 1 myń 700-i - 16 jasqa tolǵan jasóspirimder, ıaǵnı
jeke kýálikti alǵash ret alatyndar. Kóshi-qon qyzmeti basqarmasy mamandarynyń aıtýynsha, qujattardy resimdeý merzimin ótkizip alǵandarǵa
ákimshilik jaza qoldanylmaıdy. 18 mamyrdan bastap olar jeke kýálikterin Halyqqa qyzmet kórsetý ortalyǵynda ala alady.
«Tótenshe jaǵdaı kezeńinde jáne odan keıingi 60 kúntizbelik kún aralyǵynda merzimi ótken jeke kýálikter jaramdy bolyp, kúshin joımaıdy. Mundaı qujattardy 10 shildege deıin aýystyrý qajet», - deıdi SQO PD Kóshi-qon qyzmeti basqarmasynyń bastyǵy Talǵat Ábilev.
13 mamyrdan bastap kóshi-qon qyzmeti ortalyǵy, mıgratsııalyq qyzmettiń aýmaqtyq bólimsheleri sanıtarlyq talaptardy saqtaı otyra jumys isteı bastady. Alaıda jeke memlekettik qyzmetter belgili bir ýaqytqa deıin ǵana kórsetilmek.
«QR azamattyǵyn alý, shyǵý jáne qalpyna keltirý máseleleri boıynsha túske deıin qabyldaımyz. Al saǵat 14.30-dan keıin turaqty mekenjaıǵa ruqsat alýǵa bolady. Ýaqytsha turýǵa ruqsatty jáne eńbek patentin jumys kúniniń aıaǵyna deıin alýǵa bolady. Mundaı jumys kestesi kelýshilerdi seıiltedi», - deıdi Talǵat Ábilev.
Tótenshe jaǵdaı kezeńinde belgilengen merzimde elden shyǵa almaǵandarǵa jaza qoldanylmaıdy. SQO-da olardyń sany - 1 myń 500 adam adam.
«10 shildege deıin olar qosymsha qujattardy toltyrmaı-aq elden shyǵa alady. Al Qazaqstanda qalǵysy keletinder ózderiniń zańdy mártebelerin retke keltirýleri qajet. Jumys ımmıgranttary elden shyqpaı patentterin ala alady», - dedi basqarma basshysy.
Oblystyń kóshi-qon qyzmetine sońǵy eki kúnde 120 adam keldi. Olardyń basym bóligi – 87 sheteldik elde ýaqytsha turýǵa ruqsat aldy.
