SQO-da eki kúnde sheteldikterge qatysty 13 zańbuzýshylyq anyqtaldy
PETROPAVL. QazAqparat – Soltústik Qazaqstan oblysynda «Mıgrant» jedel-aldyn alý is-sharasy ótip jatyr, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, eki kúnniń ishinde óńirdiń 24 turǵyny eskertý aldy. Olar mıgratsııalyq qyzmetke úılerinde sheteldikterdiń bar ekeni týraly habardy 3 táýlik ishinde jetkizbegen. Bul – «Mıgrant» jedel-aldyn alý is-sharasy barysynda eń jıi anyqtalǵan derek. Operatsııa SQO-aýmaǵynda 1 aqpanda bastalyp, 5 aqpanǵa deıin jalǵasady.
«Qazaqstandyqtar úılerinde sheteldikterdi qarsy alǵanda mindetti túrde úsh kúnniń ishinde mıgratsııalyq qyzmetti eskertýleri qajet. Ol úshin baspana ıesi qujattarymen jaqyn mańdaǵy bólimshege barýy tıis. Al elektrondy qoltańbasy barlar egov.kz portalynda bul jumystardy qashyqtan atqara alady. Barlyq tıisti aqparatty 87152 33 00 23 telefon nómiri arqyly habarlasyp bilýge bolady», - deıdi SQO PD mıgratsııalyq qyzmet basqarmasynyń bastyǵy Talǵat Ábilev.
Operatsııa bastalǵan eki kúnniń ishinde zań buzǵan 13 sheteldik anyqtaldy. Olar jumysqa ruqsatsyz ornalasqan, tirkeý qujattarynyń merzimi ótip ketken.
«EAEO elderine kirmeıtin sheteldikter Qazaqstanda tek arnaıy ruqsatpen jeke tulǵaǵa úı jumysshysy retinde ǵana jumysqa ornalasa alady. Tekserý barysynda eki aýyl turǵynynyń óz úılerinde sheteldikterdi ruqsatsyz jumysqa salǵany anyqtalyp, jazalandy. Jalpy óńirde jaǵdaı qalypty, qazir SQO-da 2801 shetel azamaty turyp jatyr», - deıdi Talǵat Ábilev.
