SQO-da eki kúnde karantın talabyn buzýdyń 60-qa jýyq deregi anyqtaldy
PETROPAVL. QazAqparat – Soltústik Qazaqstan oblysynda senbi-jeksenbi kúnderi engizilgen lokdaýnǵa qaramastan keı dámhanalar men demalys oryndary jumys istep kelgen. Bul monıtorıngtik toptardyń reıdi barysynda anyqtaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, demalys kúnderi monıtorıngtik toptar jumysyn kúsheıtti. Karantın talaptarynyń oryndalýyn baqylaý úshin qurylǵan oǵan tártip saqshylary, prokýratýra ókilderi men sanıtarııalyq dárigerler kirgen.
SQO-da karantındik shekteýlerdiń kúsheıtilgenine qaramastan senbi-jeksenbi kúni keı dámhanalar men demalys oryndary jumys istegen, kóńir kóterý oryndarynda toı-tomalaq ótken. Reıd barysynda mamandar karantın talaptaryn buzýdyń 58 deregin anyqtady.
Máselen Petropavldaǵy «Grın park» kóńil kóterý kesheninde senbi kúni birden úsh kesh uıymdastyrylǵan. Karantındi buzǵan toı ıelerine jáne nysannyń ákimgerine 4 ákimshilik is qozǵaldy. Qonaqtar taratyldy.
Monıtorıngtik top «Sosnovyı bor» jáne «Berezovaıa roşa» demalys bazalarynda da dál osyndaı toı-tomalaqtyń ústinen tústi. Al Petropavldaǵy Shájimbaev kóshesindegi jalǵa beriletin úılerdiń birinde úılený toıy uıymdastyrylǵan. Semashko kóshesindegi jalǵa beriletin kottedjde de mamandar otbasylyq merekeni anyqtady. Senbi-jeksenbi kúnderi qoǵamdyq tamaqtaný oryndarynyń tutynýshylardy qabyldaýyna tyıym salynǵanymen ashana men eki dámhana jumys istep turǵan.
«Túsindirý áńgimeleri jáne ákimshilik yqpal etý is-sharalary halyqtyń sana sezimine áser etip, tártipti kúsheıtýge, karantın talaptarynyń satalýyna baǵyttalǵan. Bizdiń qazirgi mindetimiz – qaýipti ınfektsııanyń taralýyna jol bermeý. Barlyq jınalǵan ákimshilik materıaldar ári qaraı is-shara qoldaný úshin sanıtarııalyq qyzmetke berildi», - deıdi SQO PD bastyǵynyń birinshi orynbasary Qanat Aıtbaev.
Jalpy SQO-da naýryz aıynan beri karantın talaptaryn buzýdyń 1728 deregi tirkeldi.
