SQO-da eki kúnde 11 mas júrgizýshi ustaldy
PETROPAVL. QazAqparat – Soltústik Qazaqstan oblysynda «Quqyqtyq tártip» respýblıkalyq jedel-aldyn alý is-sharasynyń eki kúninde tártip saqshylary 11 mas júrgizýshini ustady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, elimizde 9 qarashada «Quqyqtyq tártip» respýblıkalyq jedel-aldyn alý is-sharasy bastaldy. Bul kúnderi patrýldi jáne ýchaskelik polıtseılerdiń, basqa da bólimshe qyzmetkerleriniń qylmys pen quqyq buzýshylyqtardyń aldyn alýda jumystary qyzǵan.
Eki kúnniń ishinde polıtseıler myńnan astam úıdi, saıajaılardy jáne ıesiz turǵan ǵımarattardy aralap shyqty. Jalǵa beriletin 200-ge jýyq baspana tekserildi. Profılaktıkalyq esepte turǵan 1330 adam, sonyń ishinde 164 turmysy nashar otbasymen áńgime júrgizildi. Nátıjesinde myńǵa jýyq túrli ákimshilik quqyqbuzýshylyq anyqtaldy. Negizinen, ıaǵnı 222 fakti tirkeýsiz nemese jeke kýáliksiz turýǵa qatysty. 199 derek qoǵamdyq oryndarda spırttik ishimdik ishý jáne mas kúıde júrýge baılanysty. Usaq buzaqylyqqa qatysty 88 fakti tirkeldi.
Polıtseıler jol qaýipsizdigin qamtamasyz etýge de erekshe mán berdi. Іs-shara aıasynda eń kóp zań buzýshylyq jaıaý júrginshiler tarapynan anyqtaldy, eki kúnde 180 derek tirkeldi. Jyldamdyqty asyrǵan 58 kólik júrgizýshisi jazalandy. Tek sońǵy táýlikte oblys joldarynda 5, al jalpy eki kúnde –11 mas júrgizýshi ustaldy.
«Kólik tártibiniń saqtalýyn baqylaý kúsheıtiledi. Aımaqtaǵy aýa raıy ózgerýde. Polıtsııa júrgizýshiler men jaıaý júrginshilerden barlyq erejelerdi múmkindiginshe qatań saqtaýdy suraıdy. Sonymen qatar, mal ıeleri de janýarlaryn baqylaýy tıis, ásirese kólik qozǵalysy kóp joldarda, temirjoldardyń janynda erkin jaıylymǵa jol bermeý qajet», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
«Quqyqtyq tártip» is-sharasy 11 qarasha kúni aıaqtalady.
