SQO-da eki kún ishinde 17 mas júrgizýshi ustaldy

PETROPAVL. QazAqparat – Soltústik Qazaqstan oblysynda «Quqyqtyq tártip» jedel-profılaktıkalyq is-sharasynyń eki kúni ishinde 800-ge jýyq ákimshilik quqyq buzýshylyq anyqtaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, eki kún ishinde jol erejesin óreskel buzýǵa qatysty birneshe derek, sonyń ishinde jyldamdyqty asyrýǵan 49 fakti anyqtaldy. 15 júrgizýshi jaıaý júrginshi ótkelinen ótý qaǵıdasyn buzǵan. Osyndaı jol erejesin buzýdyń saldarynan jyl basynan 55 jol-kólik oqıǵasy tirkeldi, onda 1 adam qaza taýyp, 60 adam jaraqat aldy. Sondaı-aq oblys joldarynda 17 mas júrgizýshi toqtatylǵan, onyń ekeýi esirtkige elitken bolyp shyqty.

SQO PD bastyǵynyń birinshi orynbasary Qanat Aıtbaevtyń aıtýynsha, ýchaskelik ınspektorlar sottalǵan jáne esepte turǵan adamdardy turǵylyqty jeri boıynsha tekserip jatyr. Eki táýlik ishinde 400-den asa qaraýsyz qalǵan ǵımarat, 140-tan astam jalǵa beriletin páter tekserildi. Qabyldaý-taratý ornyna turǵylyqty mekenjaıy joq 17 adam, beıimdeý ortalyǵyna eki jasóspirim jetkizildi. Túngi reıdter barysynda saǵat 23.00-den keıin jalǵyz kóshede júrgen 47 kámeletke tolmaǵan anyqtaldy. Sonymen qatar, zańsyz saqtalǵan 10 qarý tárkilendi.