SQO-da eki kún dalada adasyp qalǵan reseılik erli-zaıyptylar tabyldy
ASTANA. QazAqparat - SQO Ýálıhan aýdanynda kólikterimen en dalada joǵalyp ketken reseılik erli-zaıyptylar aman-esen tabyldy, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
Quzyrly vedomstvonyń habarlaýynsha, ótken demalysta erli-zaıyptylardyń joǵalǵany týraly aqparat belgili bolǵannan keıin búkil jeke quram izdeý jumystaryna jumyldyrylǵan. Erli-zaıyptylar «Nissan» avtokólikterimen Stepnogorsk qalasynan Reseıdiń Omby qalasyna bara jatqan.
«Balalarynyń joǵalǵany týraly áıeldiń ákesi habar berdi. Olar juma kúni Ombydaǵy úılerine jetip qoıýy kerek bolatyn. Áıeldiń ákesi Vladımır Poltavets bir táýlik boıy balalaryn izdep taba almaǵan. Aqyry, shekarada atalǵan markaly kóliktiń ótpegenin habarlaǵannan keıin ýaıymdaǵan áke SQO ІІD qyzmetkerlerinen kómek surady», - dep habarlaıdy vedomstvodan.
Quqyq qorǵaý qyzmetinen arnaıy qurylǵan top dalaǵa shyǵyp, barlyq eldi mekenderdi tekserip shyqqan. Erteńinde tańerteń taǵy 8 top qurylyp, izdeý jumysyna tipti ákimdik qyzmetkerleri jumylǵan.
«Olardyń úılerinde 4 jáne 11 jastaǵy eki qyzy kútip otyrǵan edi. Jeksenbi kúni túske taıaý Dombyraly aýylynan 4 shaqyrym jerde erli-zaıyptylar aman-esen tabyldy. Qolaısyz aýa-raıy saldarynan joldan adasyp, kólikteri júrmeı qalǵan. Eki táýlik boıy mashınanyń ishinde otyrypty», - dep habarlaıdy SQO ІІD-nen.
Qutqarýshylar men quqyq qorǵaýshylarǵa alǵysyn bildirgen Tatıana Zaıtseva men jubaıynyń qýanyshynda shek joq. SQO polıtseıleri avtokólikti jóndeýge kómektesip, reseılikterdi shekaraǵa deıin shyǵaryp saldy.
