SQO-da eki qoryqshy zańsyz maral atyp, ustaldy
SQO Polıtsııa departamenti baspasóz qyzmetiniń málimetinshe, tabıǵatty qorǵaý polıtsııasy qyzmetkerleri Esil aýdany polıtsııa bólimi qyzmetkerlerimen birge reıd barysynda «Krasnyı bor» KMM aýmaǵyndaǵy ormanda tirkemesi bar «Nıva» kóligin baıqaǵan. Rýlde 69 jastaǵy jergilikti turǵyn, qasynda Taıynsha aýdanynyń 24 jastaǵy turǵyny bolǵan. Tekserý kezinde polıtseıler tirkemeden et salynǵan polıetılen paketterdi tapty.
«Zańsyz ańshylyqqa qatysy bar eki kúdikti anyqtaldy: «Nıva» jolaýshysy men Taıynsha aýdanynyń 32 jastaǵy taǵy bir turǵyny bolǵan, ol oqıǵa ornynan erterek ketip qalǵan. Taıynshalyq eki kúdikti de qoryqshy bolyp jumys isteıdi. Olar maraldy atqan jáne bólshektegen oryndy kórsetti, ań aýlaýǵa ruqsat qujattary bolmaǵan. Budan keıin olar Esil aýdanynyń turǵynynan etti alyp ketýdi ótingen», - deıdi Esil aýdandyq polıtsııa bóliminiń bastyǵy Erlik Eslámbekov.
Atalǵan fakti «Zańsyz ańshylyq» boıynsha Sotqa deıingi tergep-tekserýlerdiń biryńǵaı tizilimine engizildi. Múshelengen et alynyp, saraptamaǵa jiberildi. Sondaı-aq kúdiktilerdiń birine tıesili kalıbri 5,56 mm «Vepr» karabıni, ańshylyq jabdyqtar alyndy. Kúdiktiniń ekeýi de qamaýǵa alyndy.
«Bul jyl basynan SQO-da tirkelgen zańsyz ań aýlaýdyń on birinshi faktisi. Tabıǵatty qorǵaý polıtsııasy ańshy jáne orman sharýashylyqtarynyń mamandarymen birlesip, udaıy reıdter ótkizip turady. Qylmystyq kodekske sáıkes zańsyz ańshylyq úshin iri kólemdegi aıyppuldan bastap bas bostandyǵynan aıyrý jazasy kózdelgenin eske salamyz. Oblys turǵyndary men qonaqtarynan zańnama talaptaryn qatań saqtaýdy suraımyz», - deıdi SQO PD bastyǵynyń birinshi orynbasary Qanat Aıtbaev.