SQO-da eki kólik sýǵa batyp ketti
PETROPAVL. QazAqparat - Soltústik Qazaqstan oblysynda 2 kólik sýǵa batyp ketti, dep habarlaıdy QazAqparat tilshisi.
Tótenshe jaǵdaı qarashanyń 19-y bolǵan. SQO Tótenshe jaǵdaı departamentiniń málimetinshe, biryńǵaı kezekshi dıspetcherlik qyzmettiń 112 nómirine Qyzyljar aýdanyndaǵy Novonıkolskoe aýylynyń mańyndaǵy Esil ózenine MTZ-80 traktory qulaǵany týraly habar túsken. Keıin anyqtalǵandaı, shóp artqan kólik júrgizýshisiniń abaısyzdyǵynan traktor jol jıeginen syrǵanap, sýǵa qulaǵan. Abyroı bolǵanda júrgizýshisi aman. Aýyl sharýashylyǵy tehnıkasy qutqarýshylardyń kómegimen muz qatqan ózennen shyǵaryldy.
Al, oqıǵanyń ekinshisi qarashanyń 20-sy Esil aýdanynda kólik júrgizýshisiniń beıǵamdyǵynan bolǵan. Oblystyń 3 turǵyny Úlken Torańǵul kóline balyq aýlaýǵa barǵan. Eskertýge qaramastan jaǵadan 400 metrdeı Úlken Toranǵul kóliniń ústine djıp avtokóligimen shyqqan. Durys qatyp úlgermegen muz temir tulpardyń salmaǵyn kótere almaı, opyrylyp túsken. Zardap shekkender joq.
«Ózen-kólderdiń beti áli tolyq qatqan joq. Sol sebepti muzǵa shyǵý qaýipti. Tipti, qaqaǵan qystyń ózinde de muz betine shyǵýǵa ruqsat etilmeıdi. Óıtkeni muzdyń astyndaǵy sý aǵyp, jyljyp turady. Sol sebepti qaýipsizdik erejelerin mindetti túrde saqtaý qajet»,-deıdi SQO Tótenshe jaǵdaı departamenti biryńǵaı kezekshi dıspetcherlik 112 qyzmet basqarmasynyń basshysy Rústem Jumaǵalıev.
Illıýstratsııalyq foto
