SQO-da eki kólik soqtyǵysyp, bir adam aýyr halde aýrýhanaǵa tústi
PETROPAVL. QazAqparat – Soltústik Qazaqstan oblysynda «GAZ 3309» kóligi men «MAN» júk kóligi soqtyǵysyp, sonyń saldarynan bir adam aýyr halde aýrýhanaǵa jetkizildi, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, oqys oqıǵa búgin saǵat 17.00 shamasynda «Petropavl-Jezqazǵan» avtojolynyń Beskól aýyly mańynda bolǵan. «GAZ 3309» kóligi men «MAN» júk kóligi soǵylyp, sonyń saldarynan birinshi mashınanyń júrgizýshisi temir qursaýda qalady. Apat ornyna órt sóndirý jáne apattan qutqarý qyzmetiniń qutqarýshylary jetip, zardap shegýshini maıysqan kabınadan deblokatsııa ádisimen, ıaǵnı temirdi kesip alyp shyqty.
Mamandar zardap shekken 52 jastaǵy azamatty kólikten 20 mınýt shamasynda alyp shyǵyp, kútip turǵan jedel járdem qyzmetine tapsyrdy.
«Ár mınýt sanaýly boldy, óıtkeni, dárigerlerdiń aıtýynsha, zardap shegýshiniń jaǵdaıy barǵan saıyn nasharlaı berdi. Onyń eki aıaǵy birdeı kólik konstrýktsııasyna qysylyp qalypty, synǵanyn keıin bildik. Vladıslavty jedel shyǵarý úshin kóp kúsh salý qajet boldy. Kabınanyń joǵarǵy jaǵyn tolyqtaı kesip aldyq», - deıdi kezekshi qutqarý bólimshesiniń jetekshisi Nurbolat Aısın.
SQO Densaýlyq saqtaý basqarmasy baspasóz qyzmetiniń málimetinshe, er adamdy jedel járdem qyzmeti Beskóldegi aýdandyq aýrýhanaǵa jetkizdi.
Mamandardyń aıtýynsha, onyń jaǵdaıy aýyr, jansaqtaý bóliminde jatyr.
