SQO-da eki er adam bes qoıdy atyp alǵan

PETROPAVL. QazAqparat – Soltústik Qazaqstan oblysynda ormanda otyn daıyndap júrgen eki er adam adasqan qoıdyń beseýin myltyqpen atyp aldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 30 tamyz kúni Aqqaıyń aýdandyq polıtsııa bólimine áıel habarlasyp, bes kún buryn 39 qoıynyń joǵalǵanyn aıtqan. Tártip saqshylary qoıdyń basym bóligin kelesi kúni kórshi M.Jumabaev aýdanynan tapty. Al jetpegen beseýiniń teri-tersegi orman ishinen tabyldy. Otqa janbaı qalǵan syrǵadan olardyń joǵalǵan qoı ekendigi anyqtaldy.

Polıtseıler sol mańda otyn daıyndap jatqan brıgadany tekserdi. 43 jastaǵy brıgadır men 46 jastaǵy jumysshy M.Jumabaev aýdanynyń ortalyǵy Býlaevtyń turǵyndary. Olar qylmysty jasaǵandaryn moıyndady. Qoılardy baıqaǵan er adamdar ańshy myltyǵymen atyp alypty. Soıylǵan qoı etiniń bir bóligi olardyń ýaqytsha turyp jatqan jerinen, qalǵany kúdiktilerdiń úıinen tabyldy. Sondaı-aq vagon ishinen zańsyz saqtalǵan qarý, 16 kalıbrli 6 oq-dári, 7 gılza tárkilenip alyndy. Keltirilgen shyǵyn 1 mln 300 myń teńgeni qurady.

«Mal urlyǵy» boıynsha qylmystyq is qozǵaldy. Kúdiktiler qamaýǵa alyndy. Qazirgi ýaqytta barlyq qajetti tergeý sharalary júrgizilip jatyr», - deıdi Aqqaıyń aýdandyq polıtsııa bóliminiń bastyǵy Rýslan Saparov.

Mal ıesi de ákimshilik jazaǵa tartylmaq. Áıel buǵan deıin de qoılaryn baǵýsyz bos qoıa bergeni úshin jazalanǵan eken. Óıtkeni bos júrgen mal urylarǵa ońaı olja.

SQO-da jyl basynan mal urlyǵyna qatysty 22 qylmys tirkelip, onyń 20-sy ashyldy.