SQO-da eki elikti zańsyz atqan kúdiktiler ustady

PETROPAVL. QazAqparat – Soltústik Qazaqstan oblysynda eki elikti atty degen kúdikpen aýyl jigitteri ustaldy. Endi olar brakonerlikpen aınalysqany úshin qylmystyq jaýapkershilikke tartylýy múmkin, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, zańsyz ańshylyqty Aıyrtaý aýdanynyń ýchaskelik ınspektorlary oıda-joqta anyqtaǵan. Jumys babymen aýyldardyń birine bara jatqan polıtseıler orman jaqqa ketken shańǵy izderin baıqaıdy. Qar ústine iz jaqynda ǵana túsken eken.

Joldyń boıyn tekserý kezinde eki sibir eliginiń eti tabyldy. Sol mańda turǵan eki adam polıtseılerdi kóre sala ormanǵa qaraı qashyp, jasyryndy. Alaıda olardyń bireýin ýchaskelik polıtsııa ınspektory tanyp qalǵan.

Kelesi kúni jedel-izdestirý is-sharalary barysynda zańsyz ań aýlady degen kúdikpen aýdannyń 22 jáne 28 jastaǵy eki turǵyny ustaldy. Olardan ańshy myltyqtary men oq-dáriler tárkilendi.

Bul fakti QR Qylmystyq kodeksiniń 337-baby «Zańsyz ańshylyq» boıynsha Sotqa deıingi tergep-tekserýlerdiń biryńǵaı tizilimine engizildi.

«Adamdar tobymen jasaǵan qylmys úshin 6 myń AEK mólsherinde aıyppuldan bastap 6 jylǵa deıingi merzimge bas bostandyǵynan aıyrý kózdelgen. Sondaı-aq ań aýlaýǵa jeti jylǵa tyıym salý túrinde qosymsha jaza qarastyrylǵan. Qazirgi ýaqytta kóptegen janýarlardy, onyń ishinde tuıaqtylardy aýlaýǵa tyıym salynǵan. Zańsyz ańshylyq úshin qylmystyq jaýapkershilik kózdelgenin esten shyǵarmaýdy jáne zańnama talaptaryn saqtaýdy suraımyz», - deıdi Aıyrtaý aýdandyq PB bastyǵy Marat Serkeshev.

Foto: polisia.kz