SQO-da eki balany órtten qutqarǵan aýyl turǵyny marapattaldy
PETROPAVL. QazAqparat – Soltústik Qazaqstan oblysynda Táýelsizdik kúnine oraı tótenshe jaǵdaılar departamentinde saltanatty is-shara ótip, 26 qyzmetker memlekettik nagradamen marapattaldy.
Jaqynda eki balany órtten qutqarǵan aýyl turǵyny da eskerýsiz qalmady, dep habarlaıdy QazAqparat tilshisi.
SQO TJD baspasóz qyzmetiniń málimetinshe, Táýelsizdik kúni merekesi qarsańynda óz isin adal jáne jaýapkershilikpen atqarǵan vedomstvonyń birqatar qyzmetkeri QR TJM, SQO TJD basshylyǵynyń jáne oblys ákiminiń atynan marapatqa ıe boldy. Departamenttiń ardagerleri de umyt qalmady. Salada birneshe jyl jemisti eńbek etken Saǵynbaı Ývalıev «Eńbek ardageri» medalin taqty.
Saltanatty jıyn barysynda Aqqaıyń aýdanynyń turǵyny Rýstam Jumabaevqa zor qoshemet kórsetildi. Er adam 4 qazan kúni Smırnov eldi mekeninde 6 jáne 11 jastaǵy eki balany órtengen úıden kóterip shyǵaryp, qutqaryp qaldy. Rýstam «Órtte kórsetken qaısarlyǵy úshin» medalimen marapattaldy. Aýyl turǵynynyń tórt balasy bar, bireýi Petropavldaǵy kásibı-pedagogıkalyq kolledjde 3 kýrsta oqıdy, bolashaq qutqarýshy.
Sondaı-aq 26 qyzmetker memlekettik nagradalarǵa ıe boldy. Sonyń ishinde departament bastyǵy Ramıl Kamalov ta bar. Azamattyq qorǵanys organdarynda 25 jyldan beri eńbek etip keledi. Bilikti basshy ІІ dárejeli «Aıbyn» ordenimen marapattaldy. SQO TJD materıaldyq-tehnıkalyq qajettiligine úsh jylda bıýdjetten 400 mln teńge bólinip, bólimshelerdiń jaraqtandyrylýy jaqsardy. Sońǵy tórt jylda aýdan ortalyqtarynan shalǵaıda jatqan 119 eldi mekendi qamtyǵan 25 órt sóndirý beketi ashyldy. Tek bıyl mamandar 3 myńnan astam apattyq-qutqarý jumystaryna shyǵyp, 350 adamdy qutqardy, tótenshe jaǵdaı aımaǵynan 1580 adamdy evakýatsııalaǵan, 62 adamǵa alǵashqy medıtsınalyq kómekti kórsetti.
