SQO-da eki aýdanda jel elektr stansalary salynbaq
PETROPAVL. QazAqparat – Soltústik Qazaqstan oblysynda bıomassamen jaǵylatyn qazandyqtardyń sany artyp keledi, nátıjesinde tek 2021 jyly kómir satyp alýdan bıýdjet qarjysy 260 mln teńgege únemdeldi, dep habarlaıdy QazAqparat tilshisi.
SQO energetıka jáne turǵyn úı-kommýnaldyq sharýashylyq basqarmasynyń málimetinshe, óńirde 2015 jyldan bastap bıomassamen jaǵylatyn qazandyqtar ornatylyp jatyr. Búginde oblysta olardyń sany 125-ke jetti, sonyń ishinde 81 bıýdjettik mekeme kóshirildi. Nátıjesinde kómir 26 myń tonnaǵa az alynyp, bıýdjettiń 260 mln teńgesi únemdelgen.
«Ótken jyly oblys aýdandarynda osyndaı 7 qazandyq ornatyldy. Bıyl bul jumystar jalǵasady. Óıtkeni alty jyldyń ishinde bıomassamen jaǵylatyn qazandyqtardyń nátıjeliligine kóz jetti. Qazirgi ýaqytta qazandyqtardy ornatý jospary qurylyp jatyr», - deıdi basqarma basshysy Baqyt Іlııasov.
Oblysta jalpy qýaty 70,3 MVt jańartylatyn energııany paıdalanatyn 174 nysan jumys isteıdi. Olar - gıdroelektr stansalary, jel generatorlary jáne bıoqazandyqtar. Sońǵy 6 jylda bulardyń qýaty 25 esege artqan.
«2022-2023 jyldary «ENERGO TRUST» JShS Aıyrtaý aýdanynda qýaty 50 MVt jel elektr stansasyn salýdy josparlap otyr. Qazirgi ýaqytta jobalaý jumystary júrgizilip jatyr. Sondaı-aq Taıynsha aýdanynda «Green city KZ» JShS 2022-2024 jyldary qýaty 10 MVt jel elektr stantsııasyn salýdy josparlaǵan. Jańartylatyn energııa kózderi boıynsha jobalardy júzege asyrý oblystaǵy ekologııalyq jaǵdaıdy jaqsartýǵa jáne qorshaǵan ortaǵa lastaýshy zattar men parnıktik gazdar shyǵaryndylaryn azaıtýǵa, iri aýqymdy apattar qaterin azaıtýǵa múmkindik beredi», - deıdi Baqyt Іlııasov.
