SQO-da eki apta ishinde 300-den astam zańsyz pırotehnıkalyq ónim tárkilendi
Polıtsııa qyzmetkerleri vedomstvolyq akkaýnttarda tikeleı efır uıymdastyryp, merekede quqyq buzýshylyqtardyń jáne sertıfıkattalmaǵan pırotehnıkalyq zattarmen baılanysty bolatyn oqys oqıǵalardyń aldyn alýǵa arnady.
Tártip saqshylary jeli qoldanýshylaryna jańa jyldyq merekeler kezinde jazataıym oqıǵalardyń sany edáýir artatynyn eske saldy. Qujaty joq, sondaı-aq qaýipsizdik tehnıkasy men nusqaýlyqtardy buza otyryp petardalar, otshashýlardy paıdalanýdyǵ saldary aýyr jaraqattar men órtterge ákelýi múmkin. Jeltoqsannyń 15-i men 30-y aralyǵynda ákimshilik polıtseıler «Pırotehnıka» respýblıkalyq jedel-profılaktıkalyq is-sharasynyń birinshi kezeńi aıasynda jumys istedi. Olar lıtsenzııasy joq pırotehnıkany satý oryndaryn anyqtady. Oblys ortalyǵynda qala turǵyndaryna sertıfıkattalǵan taýardy satatyn eki dúken ǵana jumys isteıdi. «Pırotehnıka» is-sharasynyń ekinshi kezeńi 5 qańtarda bastalady.
«Іs-sharanyń birinshi kezeńinde oblys aýmaǵynda polıtsııa qyzmetkerleri QR Ákimshilik quqyq buzýshylyqtar týraly kodeksiniń 196-baby boıynsha 16 quqyq buzýshylyqty anyqtady. Sondaı-aq 320 dan astam sertıfıkattalmaǵan pırotehnıkalyq ónim alyndy. SQO turǵyndary men qonaqtaryna qaýipsizdik erejelerin qatań saqtaý qajet ekenin eske salamyz. Ata-analar balalaryna pırotehnıkalyq zattardy ózdiginen paıdalanýǵa jol bermeýi tıis, sebebi bul ónimderden jaraqat alý qaýpi joǵary», - deıdi SQO PD Ákimshilik polıtsııa basqarmasynyń bastyǵy Serik Áljanov.
