SQO-da eki adamdy óltirgen kúdikti ustaldy
PETROPAVL. QazAqparat – Zarechnyı aýylynda kezdeısoq ótip bara jatqan adam jartylaı qańqaǵa aınalyp bara jatqan múrdeni baıqaǵan, dep habarlaıdy QazAqparat.
Soltústik Qazaqstan oblystyq Polıtsııa departamenti baspasóz qyzmetiniń málimetinshe, sot-medıtsınalyq saraptama qylmystyq belginiń bar ekenin kórsetti. Adam óltirilgeli beri birneshe aı ótken, onyń saýsaqtarynyń izin alý múmkin emes.
Aǵa krımınalıst Jaqsylyq Ýalıev arnaıy óńdeýden keıin alaqannyń bir bóligin sýretke túsirdi. Sýret daktıloskopııalyq «Papılon» derekqory arqyly tekserildi. Marqum turǵylyqty mekenjaıy joq, 36 jastaǵy petropavldyq ekeni anyqtaldy.
«Eki táýlik boıy jedel qyzmetkerler, ýchaskelik ınspektorlar qylmysty ashýǵa tyrysty. Marqumnyń ólimine qatysy bolýy múmkin aınalasyndaǵy adamdardy tekserý kezinde taǵy bir jaıt ashyldy. Qaza tapqan er adammen birge júretin áıel de joǵalyp ketken. Jedel izdestirý sharalarynyń nátıjesinde eki adamnyń ólimine kúdikti 35 jastaǵy er adam qolǵa tústi. Ol kórshi oblysqa qashyp ketken», delingen habarlamada.
Qylmysker áıel adamnyń denesin qaıda jasyrǵanyn aıtty. Belgili bolǵandaı, ekinshi máıit alǵashqy qańqa tabylǵan jerge jaqyn bolǵan. Ólgen áıeldiń kim ekeni alaqanynyń fotosýretin derekqor málimetterimen salystyrý arqyly anyqtaldy.
«Adam óltirý» qylmystyq baby boıynsha sotqa deıingi tergeý júrip jatyr. Kúdikti ýaqytsha tergeý ızolıatoryna qamaldy.
Avtory Olesıa Jýkoven
