SQO-da eki adam órtten qaza tapty
PETROPAVL. QazAqparat – Soltústik Qazaqstan oblysynda órttiń saldarynan eki adam qaza tapty. Mamandardyń aıtýynsha eki jaǵdaıda da otty abaısyz qoldaný sebep bolǵan, dep habarlaıdy QazAqparat tilshisi.
SQO Tótenshe jaǵdaılar departamentiniń málimetinshe, 17 tamyz kúni túngi saǵat 23.25 mınýtta órt sóndirý qyzmetine Petropavldaǵy «Mıchýrıno» saıajaı qoǵamdasyǵynda úı órtengendigi týraly habar túsedi. Oqıǵa ornyna jetken mamandar saıajaı úıiniń ishinen áıeldiń denesin tapty. 1970 jyly týǵan áıel sonda jaz boıy turǵan eken. Aýmaǵy 18 sharshy metr bolatyn saıajaı tolyǵymen janyp ketti.
«Ekinshi órt 20 tamyz kúni boldy. Aqqaıyń aýdany Poltavka eldimekeninde jekemenshik garajdardyń birinde órt shyǵyp, ol qora-qopsyǵa taraǵan. Oqıǵa ornynan 1939 jyly týǵan er adamnyń máıiti tabyldy. Qazirgi boljam boıynsha eki órtte de otty abaısyz qoldaný sebep bolǵan», - deıdi SQO TJD basqarmasynyń bastyǵy Dmıtrıı Rastıhın.
Jalpy jyl basynan SQO aýmaǵynda 397 órt tirkeldi. Kelgen materıaldyq shyǵyn 55 mln teńgeden asady. Otyz adam órtte mert bolyp, 13 adam jaraqat aldy.
