SQO-da eki zańdy tulǵanyń ǵana pırotehnıkalyq ónimdi satýǵa lıtsenzııasy bar

Soltústik Qazaqstan oblysynda «Pırotehnıka» jedel-aldyn alý is-sharasy aıasynda zańsyz saýdadaǵy pırotehnıkalyq ónimderdi anyqtaýǵa, aınalymnan alýǵa, durys saqtaý men paıdalanýǵa qatysty reıdter uıymdastyrylmaq, dep habarlaıdy Kazinform.

SQO polıtsııa departamenti ákimshilik polıtsııa basqarmasynyń erekshe tapsyrmalar jónindegi aǵa ınspektory Qurman Mýsınniń aıtýynsha, «Pırotehnıka» profılaktıkalyq is-sharasy 25 jeltoqsan bastalyp, 3 qańtarǵa deıin sozylmaq. Reıdter SQO tótenshe jaǵdaılar departamentiniń qyzmetkerlerimen birge uıymdastyrylady.

«Pırotehnıkalyq buıymdardy zańsyz satý anyqtalǵan jaǵdaıda kinálilerge 25 AEK mólsherinde nemese 86 250 teńge aıyppul salynady.

Qazirgi ýaqytta SQO-da eki zańdy tulǵanyń ǵana otshashýlardy satýǵa lıtsenzııasy bar. Olar: «Petropavlovsk-Salıýt» jáne «KMD HOLDING» JShS-leri. Bireýi K.Sútishev kóshesi, 55, ekinshisi M.Jumabaev kóshesi, 91 mekenjaıynda ornalasqan», - deıdi Qurman Mýsın.

Byltyr polıtseıler men azamattyq qorǵanys organdary ókilderiniń birlesken is-sharalarynda 18 ákimshilik quqyq buzýshylyq anyqtalǵan. 939 pırotehnıkalyq ónim tárkilenip, 689 myń teńgeniń aıyppuly salyndy.

Pırotehnıkany paıdalanǵannan zardap shekkender bolǵan joq.