SQO-da eki iri dala órti sóndirildi
PETROPAVL. KAZINFORM — Soltústik Qazaqstan oblysynda ótken táýlikte qutqarýshylar men ózge de qyzmetterdiń mamandary jalpy aýmaǵy 39 ga taraǵan eki iri órtti aýyzdyqtady.
SQO Іshki saıasat basqarmasynyń málimetinshe, órttiń biri Shahovskoe aýylynyń mańynda, qatty turmystyq qaldyqtar polıgonynyń artynda boldy. Qurǵaq shóp pen qamys janyp, ekpini sekýndyna 25 metrge deıin jetken qatty jel saldarynan ol 12 ga aýmaqqa tarady. Batpaqty jer jáne bıiktigi eki metrge deıingi qalyń qurǵaq ósimdik jamylǵysy da órtti tez arada sóndirýge kedergi keltirdi. Tótenshe jaǵdaıdy joıýǵa 150 tonna sý qory bar órt sóndirý poıyzy tartyldy. Zardap shekkender men mert bolǵandar joq.
Ekinshi órt Qyzyljar aýdanynyń Maloe Beloe aýyly mańynda tirkeldi. Munda 25 gektar aýmaqta qurǵaq shóp janǵan. Mamandardyń aıtýynsha, órtti sóndirý qatty jel men kireberis joldardyń bolmaýyna baılanysty qıyndady. Jalynnyń orman alqabyna jaıylý qaýpi týyndaǵan.
Oqıǵa ornynda jedel shtab qurylyp, úsh jaýyngerlik ýchaske uıymdastyryldy. Mamandar aýmaqty jyrtyp, mıneraldanǵan jolaq jasady.
Qutqarýshylardyń, orman sharýashylyǵy mekemeleriniń, jergilikti atqarýshy organdardyń jáne basqa da qyzmetterdiń birlesken jumysynyń arqasynda órttiń odan ári taralýyna jol berilmedi. Eldi mekender men saıajaı alqaptaryna jalyn jetkizilmeı, sóndirildi. Zardap shekkender joq.
Jalpy ótken táýlikte óńirde órt sóndirýshilerge 35 ret jedel shaqyrtýmen shyǵýǵa týra kelgen. 26 órt pen janý sóndirildi; eki iri dala órtinen bólek, 2,1 ga aýmaqta bir orman órti tirkeldi.
Órtti sóndirýge 300-den astam adam men ózara is-qımyldaǵy qyzmetterdiń mamandary jumyldyryldy, 110-nan astam tehnıka tartyldy. Shahovskoe aýyly mańyndaǵy órtti sóndirýge órt sóndirý poıyzy qatysty.
Buǵan deıin Almatyda 12 qabatty úıdegi órtten 10 adam qutqarylyp, 72 turǵyn kóshirilgenin jazǵan edik.
